Kynthoh ka MSSASA ia ki Non-Teaching Staff halor ka jingbym pyllait ia ka tulop jong ki na ka bynta u Naitung

Syllad | The Rising MeghalayaAugust 7, 2024

Ki nonghikai SSA hapoh ka lama jong ka Meghalaya Sarva Shiksha Abhiyan Schools Association (MSSASA) ha ka 6 tarik Nailar ki la kynthoh ia ki Nongtrei SSA (Non Teaching Staff) halor ka jingbym pyllait ia ka tulop jong ki kaba dei jong u bnai Naitung ba la dep tang namar ka jingiakhih shong kyllain mungor kaba dang iai bteng ka jong ki namar ka jingpynslem jong ka sorkar ban pynkiew ia ka tulop jong ki.

Ha ka shithi ba la phah sha u State Project Director, Samagra Shiksha & Director of School Education and Literacy u Swapnil Tembe, u president ka MSSASA u Bah Aristotle C Rymbai u la maham da kaba pynpaw ruh, “Kumta ruh ha ka jingialang kaba la shong kyrkieh jong ka Association kaba la long ha ka 5 tarik mynta u bnai, ngi la shim ia ka rai ban dawa jur lyngba jong phi na ka bynta ban pyllait noh mardor ia ka tulop jong ki nonghikai SSA, bad lada kane kam urlong ki Non Teaching Staff kin hap ban shim ia baroh ka jingkitkhlieh lada mih kano kano ka jingjia.”

U la ong ruh ba ka Tnad Education ha ka 25 tarik u Naitung ka la dep phah ia ka sanction order sha baroh ki district na ka bynta ban pyllait noh ia ka tulop jong ki nonghikai SSA kaba dei jong u bnai Naitung ba la dep.

“Hynrei, ngi la ioh jingtip ba ia ka tulop jong ngi la bat da ki Non Teaching Staff jong ka Samagra Shiksha Abhiyan namar ka jingiakhih kaba dang bteng jong ki,” ong u Rymbai da kaba bynrap, “Kane ka jingleh jong ki Non Teaching Staff ban bat ne set ia ka tulop jong ki nonghikai SSA wat hadien ba la dep pyllait da ka tnad Education ia ka sanction order naduh ka 25 tarik u Naitung ba la dep ka dei ka jingpynduh iaka hok jong ki nongtrei SSA kumba la pynthikna katkum ka kyndon 21 bad ka hok ban ioh ia ka jingdon jingem kumba la pynthikna katkum ka Article 300 jong ki Riti Synshar Ri bad ia kaba ym lah ban pdiang da lei lei bad ka seng ka pynrem jur ia kum kane ka jingleh beain.”

“Ki Non-Teaching Staff ka SSA ki don iaka hok ban iakhih kumba la pynskhem da ka Article 19(1)(a) bad Article 19(1)(b) jong ka Riti Synshar Ri, hynrei kane kum kane ka jingiakhih ka dei ban long kaba pyniabiang, bad kam lah ban long ka daw ban ym pyllait/set ia ka tulop jong ki nonghikai SSA namar ba ngi ki nonghikai SSA ngim don lad kamai da kiwei pat bad ngi shaniah tang ha ka tulop jong ngi na ka bynta ka jingim jong ngi,” u la pynpaw shuh shuh.

Ki nongtrei SSA Non Teaching Staff ki la pynlong ia ka jingiakhih shong kyllain mungor ba khlem da buh por mynta lah 7 sngi kynthih ban dawa na ka sorkar ban pynkiew ia ka tulop ba 80% bad ban pynkiew 5 percent man la u snem.