Kynthoh ka VPP ba pynhun ka MPSC tang ia ki jingkwah ki politician bad kiba don ha ka bor

Syllad | The Rising MeghalayaDecember 13, 2024

Ka liang pyrshah Voice of the People Party (VPP) ha ka 12 tarik Nohprah ka la kynthoh ba ka Meghalaya Public Service Commission (MPSC) ka la shu pynhun tang ia ki jingkwah jong ki politician bad ki briew kiba don ha ka bor bad kaba iahap ruh ban pynkylla kyrteng noh ia ka da ka ‘Mostly Politicians’ Service Commission.

Ia kane ka jingkynthoh la pynmih haba kdew ha kaba iadei bad ka result jong ka written test na ka bynta ka eksam MCS.

“Ka MPSC ka thmu na ka bynta ban shakri ia ka jyll bad ki briew jong ka da kaba thung ia ki briew kiba tbit bad kiba kotbor. Hynrei, lada ka dang iai bteng ban pynhun ia ki jingkwah jong ki politician bad kito kiba don ha ka bor, kumta kan kan iahap ban pynkylla kyrteng noh sha ka ‘Mostly Politicians’ Service Commission.’ Bad lada ban ioh ia ka kam ka donkam ban pyndap ia ka pla tyngka jongno re jongno, te ka kham long kaba biang ban khot noh da ka ‘Money Pays Service Commission,” ong ka VPP lyngba u kyrwoh.

“Ka jingthmu jong ka MPSC ka long ban pynthikna ia ka jinglong hok bad khuid ha kaba iadei bad ka thungjam thungjam.Ka MPSC kam dei satia ka jingdon jingem ba shimet jong kano kano ka sorkar kaba don ha ka bor, kynhun business, ki Sengbhalang ne ki seng sain pyrthei. Ka dei ban pynneh ia ka jinglong pdeng, ka jinglong ba shisha bad ban pynjngai ia lade na kino kino ki jingiadei bad ki sain pyrthei,” ka la bynrap.

Ka VPP ka la kynnoh ba ka result jong ka written test jong ka eksam MCS ba la pynlong da ka MPSC ka la pynmih ia shibun u dak jingkylli katba bun ki kyrtong kiba shu sah ha ka lyngngoh bad shah shukor.

“Ka long kaba la tip bha ba kito kiba don ha ka sorkar ba mynta ki donkti ha ki kam leh shiliang khmat tang na ka bynta kito kiba don ka jingiadei bad kiba iajan bad ka sorkar.Namar kata ka MPSC ka la pulom ban ioh ia ka jingshaniah hapdeng ki samla,” ong ka VPP da kaba bynrap, “Da kaba bishar na ka jingmih lyngba ka result MCS, kiba bun ki iohi ba ka long kaba thikna ba ka don ka kam lehthok kaba synshar ia ka MPSC.

Nalor kata ka VPP ka la ong ruh ba ha ki paidbah hi baroh ka don ka jingsngewthuh halor ka jingbym beit bad ka jingdkhoh kaba la iaid la bun bun snem ia kaba la ailad ba kan iai bteng bad kaba la ktah jur ia kiba angnud ban ioh kam ioh jam bad na ka bynta kito kiba kwah ban ai ka jingshakri hok ia ka Jylla.

Haba dawa ba ka MPSC ka dei ban pynpaw haduh katno ngut ki kyrtong ki la shah jied bad shah pynrung sha ka kam, katno ki marks ki kyrtong ki dei ban ioh na ka bynta ban pass ia ka eksam, ka VPP ka la ong ba ka MPSC kam lah satia ban buhrieh ha ka nongrim jong ka jinglong kyrpang bad jingiada ia ki hok jong ki riew shimet, ka dei ka jaka treikam paidbah bad kaba la teh da ki nongrim jong ka hok, ka jingleh hok bad ka jingkitkhlieh.