Kynthoh kylla u Dy CM ia u Bah Pala halor ka jingkynnoh nongaiktien ka RSS – BJP

Syllad | The Rising MeghalayaAugust 24, 2024

U National General Secretary ka NPP uba dei ruh u Symbud Myntri Rangbah ka Jylla u Bah Sniawbhalang Dhar ha ka 23 tarik Nailar u la ther tyngeh ia u nongialam ka Congress u Bah Vincent H Pala halor ka jingkynnoh ba u dei u nongaiktien ka RSS -BJP da kaba kyntu ruh ia u ba u dei ban bishar bniah halor ka jingphet phet jong ki MLA hapoh ka jingialam ka jong u.

Haba ther kylla ia u Bah Pala, u Sniawbhalang u la ong ba baroh ki tip ba kane ka jingkynnoh jong une u nongialam Congress pyrshah ia u ka dei kaba bakla.

“Nga dei u General Secretary ka NPP kumno la pyniasoh ia nga bad ka BJP?, Hooid ngi la iatreilang bad ka BJP na kine ki hynniew snem kiba la leit noh na ka bynta ka roi ka par. Ka Meghalaya kum ka Jylla kaba rit ngi donkam ia ka jingkyrshan jong ka Sorkar Pdeng na ka bynta ka roi ka par.Kata ka dei ka jingmut jong ka Sorkar MDA. Kam mut satia ba ngi iatreilang bad ka BJP, ngi dei ki nongaiktien ka BJP ne RSS. Kane ka jingkynnoh ka dei ka bym don nongrim,” u la ong haba kren sha ki lad pathai khubor.

“Nga ju burom ia u Bah Pala kum u MP barim bad kum u president ka MPCC. Ngim shym la khmih lynti ba u nongialam kum ma u ba un pynmih ia kiba kum kine ki jingkren khunlung khynnah,” ong u Bah Sniawbhalang da kaba bynrap, “U tip ba ka longiing jong nga ka wan na ka jingtreikam lajong sha ka rynsan sain pyrthei bad ym na ka sain pyrthei sha ka kam lajong. Baroh ki tip ba ngi dei ka construction company kumta ka jingkynnoh bamsap kaba mih lyngba ki kam drok ki long kiba bakla shibun.”

Da kaba kyntu ia u Bah Pala ba u dei ban da bishar bniah, une u nongialam ka NPP u la ong, “Ha ka khyllipmat ba u shimti kum u president ka MPCC, haduh 12 ngut ki MLA mar mar ki la leit ban pyniasoh sha ka TMC. Hato phin kynnoh ia u Sniaw halor kata? Hadien wan ka elekshon ha u 2023, ka kong Ampareen, u Kimfa bad u Bah Rapsang ki la wan pyniasoh sha ka NPP.  Phi mut ban ong ba Nga khot ia ki ban iasoh sha ka NPP. Katba u Bah PT Sawkmie bad u Mayralborn Syiem ki la leit ban pyniasoh sha ka UDP. Kane ka pyni ba u Bah Pala um lah satia ban tehlakam ia la ka jong ka iing.Kumjuh dang shen laingut ki MLA ka Congress ruh ki la wan pyniasoh sha ka NPP. Kumta, u dei ban shong bishar ia lade bad wad ia kaei kaba bakla ha la ka jong ka iing.Ban kynnoh ia ka NPP ba ki MLA ka Congress ki wan pyniasoh ka dei ka bym iahap satia..Ngi pdiang ia kino kino kiba kwah ban pyniasoh.”

Nalor kata u Bah Sniawbha ula kop ruh ia u Bah Pala ba un pynshisha ia ki jingkynnoh ba ka Dhar Company ka leh ia ki kam beain.

“Ban ong ba ka kompani jong nga ka don hapoh ka jingpeit pyrman ka CBI, ngi tip ba kam don satia kaba kum kata. Sngewsih, ba kum u MP barim ban ong ba ka kompani ka la donkti ha ki kam khaii droks, nga sngew ba kum ki nongialam ngi dei ban iasnohkti lang ban iakhun pyrshah ia u drok bad ban pynduh jait na kane ka Jylla. Nga sngew ba ki jingkynnoh ba khlem nongrim ka dei ka bym lah satia ban pdiang” ula ong.