Kynthoh u MP Rajya Sabha iaki party kiba kwah ban pynduh iaka district council

Syllad | The Rising MeghalayaFebruary 16, 2025

U MP Rajya Sabha, Dr Wanwei Roy Kharlukhi haka 15 tarik Rymphang ula wan ialap elekshon na ka bynta u kyrtong ka party NPP na Jowai North, u Dr DI Kjam ha madan skul ka shnong Ladthadlaboh.

Haba kren ban pan jinkyrshan ia u kyrtong ka party, ula kynthoh tyngeh iaki party kiba kwah ban pynduh pyndam iaki District Council da kaba thmu ban wanrah iaka ain thymmai ka Article 371. Ula ong ba ngi donkam iaka District Council ban pynneh pynsah iaka riti ka dustur bad ka khyndew ka shyiap.

Ula ai nuksa iaka Jammu and Kashmir ha kaba ka sorkar pdeng kala pynduh iaka bhah kyrpang da kaba weng iaka Article 370 bad thaw iaka Ladakh da ka Union Territory.

Ula pynpaw iaka jinglyngngoh ba don ki party kiba kwah ban pynduh iaka district council, bad ula buh jingkylli hato ki bishni iaki shnong ki thaw ban ioh iaka pisa lyngba ka direct funding.

Ha kaba iadei bad ka direct funding, kane kan urlong noh shen bad ka shong haka parliament ynda kala wanrah ban pynkylla ne amend iaka Sixth Schedule, kane kan long kawei na ki ain ka ban wanrah jingmyntoi tam iaka council lyngba ka direct funding, ka pisa kan poi beit sha ka shnong na ka bynta kino kino ki kam pynroi pynpar.

Haba phai sha ka jingshim jait na kynthei, u MP ula pynksan ba ka kynthei kadei hok ban ioh iaka jait ka kynja, namar ba kala aiti iaka jingim jong ka ban heh san ka jaidbynriew bad bynrap ba katne roi ka jaidbynriew jong ngi ka dei na ka jingiohi jngai ki longshuwa mashuwa ban ai iaka jait ka kynja sha kynthei.

KIwei kiwei kiba kren ha kane ka jingialang ki kynthup ia u MLA Jowai Wailadmiki Shylla, Edystone Shylla nalor u kyrtong ka party.