Kynthoh u Myntri ia ka jingiakhih ka VPP halor ka jingkiew dor ki marbam kum ka buit politics

Syllad | The Rising MeghalayaSeptember 14, 2024

U Myntri Sorkar uba khmih ia ka Tnad Food & Civil Supplies u Bah Comingone Ymbon ha ka 13 tarik Nailur u la kynnoh ia ka jingiakhih jong ka Voice of the People Party (VPP) halor ka jingkiew dor jong ki mar bam mardih ha ka Jylla kum ka buit politics ban pynbiej ia ki paidbah shwa ka elekshon sha ki Autonomous District Council (ADC).

U la pynshai ruh ba ka jingbym don ia ki lynti rel bad ka jingshaniah tylli ha ki trok ban pynpoi ia ki mar ki mata ba kongsan ki long ka daw bah kaba la noh synniang halor kane ka jingkiew dor.

Kane ka jingkren jong u ka long kum ka jingkynthoh halor ka jingïakhih shong kyllain mungor ba shisngi ba la pynlong da ka VPP kum ka dak ka jingpyrshah ïa ka jingkiew dor jong ki marbam mardih ba kongsan kaba la ktah jur ïa ki paidbah ka jylla Meghalaya.

Haba kren ha ka jingialang bad ki lad pathai khubor, u Ymbon u la ong ba ka jingiakhih jong ka VPP kam dei kaei kaei hynrei ka dei ka buit sain pyrthei namar ba ka elekshon sha ki ADC ka la jan. “Mynta ka elekshon MDC ka la jan bha, ki hap ban ïalehkai kumta. Ki hap ban pynbiej ia ki paidbah ka Jylla.” u la ong.

Da kaba pynpaw ba ki don bun kiei kiei kiba pynlong ïa ka jingkiew dor jong ki mar ki mata ha Meghalaya, u Myntri u la ong, “Ha Meghalaya, ngim don lynti rel, ngi shaniah pura tang ha ki trok na ka bynta ban kit bad pynpoi ia mar ba kongsan.”

U la kdew ruh ba ka jingbym don lynti rel ha kiba bun ki bynta ha Meghalaya kala nang pynsniew shuh shuh ïa ka jinglong jingman bad ula ai nuksa ba ka lynti rel ha Mendipathar ha rilum Garo ka lah ban pynhiar ia ka dor ka mur. “Ha Rilum Garo, ngi don ia ka lynti rel, u khaw u kham tad dor haduh T.13 haba ianujor bad ka nongbah Shillong, kaba ngi shaniah ha ka jingkit jingbah da ki kali,” ula bynrap.

Kawei pat ka daw, u la kdew ka dei ka rai jong ka sorkar ban khang ban iaid ki trok heh lyngba ka jingkieng Umiam. “Namar kane, ka jingjngai ka la kham jngai namar ba ki trok kin hap ban ïaid lyngba ka Mawryngkneng (Shillong bypass),” u la ong haba bynrap “Phi ïohi ki trok ki wan na Guwahati beit beit sha Shillong hynrei mynta ki hap ban leit na Shillong Bypass na Mawryngkneng bad sha Shillong la jan 60-70 km ka jingiapher.”

Katkum ka jingong jong u, ka Meghalaya kam dei satia ka jylla kaba pynmih mar bad ka shaniah tylli ia ki mar ki mata ba kongsan na shabar ka Jylla. Halor ki sienjam ba la shim ban peit ia ka jingkiew dor, u Myntri u la pyntip ba ka tnad ka dang pynlong ia ka jingkhynra man ka por.

“Ngi don ia ka Price Monitoring System ban peit bniah ia ki dor ki mur. Ha u snem 2021-2022 ka tnad jong ngi ka la pynlong 78 tylli ki jingkhynra, ha u snem 2022-2023, 106 sien, 2023-2024 haduh mynta ka sngi la pynlong haduh 442 tylli ki jingkhynra”, U la ong.

Haba ther kylla ia ki jingkynnoh da ka liang pyrshah VPP, u myntri u la ong, “Don ki seng saiñpyrthei kiba kynnoh ïa ngi ba ka sorkar kam shym la leh ei ei ha kaba ïadei bad ka jingkiew dor. Hynrei katkum ka jingtip ka jong nga na ka Tnad baroh ki Deputy Commissioner ki la leh ïa la ka jong ka kam halor kane, ki la buddien man ka por kaba ïadei bad kane.”

Shuh shuh u la kam ba kam don satia kano kano ka jingkiew dor jong ki mar ki mata ba kongsan kumba ka long mynta. “Ka dor ka long kaba thikna. Wat na ka sorkar ruh ngi pyrshang ban trei shitom ban pynbeit ia ki dor ki mut,” u la bynrap.