Kynthuplang iaka JHADC Daloi Waheh Shnong sengbhalang hapoh ka regional committee pynbeit pud ong ka sur u paidbah haka jingialang ha Mukroh

Syllad | The Rising MeghalayaDecember 5, 2021

Ki lai ngut ki MDC jong ka Jaintia Hills Autonomous District Council ba kynthup ia u MDC Saphai u Ma Habahun Dkhar, MDC ka Barato – Mukroh  u Ma Aibor Shadap, MDC Mynsngat Khanduli u Ma Dawan Lyngdoh nalor u Dolloi Elaka Raliang, Dolloi Elaka Chiliang Myntang, Dolloi Elaka Nongjngi bad ka Hynñiewtrep Border Disputed Redressal Forum (HBDRF) kila pynlong ïaka jingïalang paitbah haka shnong Mukroh West Jaiñtia Hills District haka Sngi Saitjain ban iakren halor u pud u sam u ba iasam hapdeng ka Meghalaya Assam.

Ka jingthmu jong kane ka jingïalang ka long naka bynta ban wanrah iaka jingiatylli ïaryntih hapdeng ki paid nongshong shnong kiba don haki shnong khappud bad ki shnong ba marjan bad ki paid Khasi Pnar kiba shong basah hapoh ka Elaka kaba la iap ka Labang Nangphyllut &Pangam Raliang kaba tip kum ka Block-1.

Ha kane ka jingïalang la iadon lang ki ar ngut ki MDC jong ka Barato- Mukroh bad Mynsngat Khanduli, U Dr H. Lamin Ex. MLA jong ka ne ka thaiñ, MM Thaiang Secretary Labang Nangphyllut Pangam Raliang Council, u J Lyngdoh Education Secretary KSU Jaiñtia Hills, R Lamare President HYC Jaiñtia Hills District, TR Suchen Secretary JSU Central Body, C Ryngki Vice President HNYF West Jaiñtia Zone, Kong. R Shylla President JWAM, C Sungoh Chairman – HBDRF, ki Rangbah shnong naki shnong bapher bapher lem bad ki paitbah ba bun balang.

Iaka jingïalang la pynïaid da u Ma Aibor Shadap kum u Chairman, laioh ïaka jingkren pdiang da u H Sumer waheh shnong Mukroh Pyllun

La ioh ïaki jingkren naki nongïalam sengbhalang, HYC, KSU, JSU, HBDRF, na u Ex- MLA  Dr. H Lamin, na u Ma MM Thaiang bad naki waheh shnong bapher bapher jong ka Block-1 .

U Ma MM Thaiang haka jingkren jong u u la iathuh kum ka jingïathuh khana ïaka ei kaba lajia shisha haki phew snem kiba ladep  kata haka snem 1972 haka ba ka sorkar Assam ha shwa ban pynbna iaka jylla Meghalaya kum ka state kaba pura kala wan sieh jubor ïaki mawpud ha shilynter ki shnong khappud kata naduh naka shnong  Mokoiram haduh  shnong Psiar. U la ong ba ki pulit Assam kila kem ia u lem bad kiwei pat ki riew rangbah bad rah sha phatok ha Nagaon naka daw ba u pyrshah ïakane ka jing leh jong ka Sorkar Assam.

U kren shai ruh ba ka kampud kam sam haka jingïadei bad ka Block-1 kam dei shuh ban hap hakata ka thup iakhajia pud hynrei kadei satang ban pynphai noh (re-transfer) katkum ba la dep jurip lang daki ar tylli ki Districts Councils ka United Cachar & Mikirs Hills District  bad ka United Khasi & Jaiñtia Hills District  iaka ba la leh kat kum ka order jong ka sorkar Assam haka ba lasdang naduh ka 17 Feb 1958 na Umbaso bad pyndep ha Jrikyndeng haka 23 Feb,1958 hakaba ladon ki jingthoh jingtar bad ki sakhi satar kiba biang.

U ong ruh ba lada ka sorkar Assam bad Meghalaya kim burom ïaka ei kaba kila leh ïaka ban pynphai biang ïakane ka jaka te lada jia ba  mih kaei ka ei ka jingjia nakane ka daw te ka sorkar ka dei ban shim iaka jing kitkhlieh .

U la ong ruh ba  ym dei ban thaw ïaki jing iakhajia, hynrei dei ban thaw noh daka Non Co- operative Movements bad dei ban sangeh noh shisyndon ban shim bad pdiang ïaki skhim ki kran naka sorkar Assam. U la kyntu bad kyrpad ïaki para nongshong shnong kiba don sha Meghalaya kiba shong basah haki jaka khappud ba kin long kiba don jingieit jing sngewlem bad ban iarap ïaki para doh parasnam kiba don sha poh Labang Nangphyllut & Pangam Raliang.  U la pynkynmaw ruh ba haka snem 2003 haka por refugee ki Labang Nangphyllut ha Sahkhwe (Sahsniang)  u Dr. DD Lapang Chief Minister Meghalaya bad u Rouponsingh Ronghang MLA Assam kila kular ban pynphai noh ïaka ne ka jaka sha Meghalaya . Bad da kumta kine ki briew ki la kloi ban leit phai biang shaki shnong ki thaw jong ki.

Uwei u riew rangbah u bym kwah ban pynpaw kyrteng u ong baka daw jong ka pyrshah jong ki paid Khasi Pnar ban don shapoh Assam bad ban wanphai sha Meghalaya ka dei halor ka nongrim  jong ka khyndew ka shyiap,  ka ktien ka thylliej jong ki briew kiba shong basah haka, ka ai kur ai jait, ka niam ka rukom bad ka riti ka dustur jong ki. U ong ruh ba lada ki ar sorkar kim sngap ïakane te kim ban se ban u jor sha Supreme Court.

Da kawei ka sur baroh kynthei bad shynrang kiba don hakane ka jingïalang kila rai ban  iengbeit halor kane ka nongrim ban dawa naka sorkar ban pynphai biang ïaka Block-1 sha Meghalaya. Ban leit ai ïaka jingthoh sha u Chief Minister jong ka Meghalaya halor jong ka ne ka phang. Kane ka dorbar ka kyntu bad kyrpad ïaka Regional Committees jong ka Meghalaya ba ka dei ban kynthup lang ïaka JHADC, ki Dolloi, ki waheh shnong, ki nongïalam seng bhalang bad ki riew rangbah jong kane ka thaiñ  haka ne ka Committee bad ban leit jurip ruh shaduh sha ki shnong kiba don sha ki bynta kiba khatduh tam jong kata ka jaka iakhajia pud.

La kyntu ïaki paid nongshong shnong kiba shong basah haki thaiñ khappud baroh ba kin pynbiang lut ïaki patta ki land holding jong ki sha poh JHADC kumba la tyrwa ei ïaka ban leh registration.

Ki nongkren naki nongïalam sengbhalang baroh ki pynpaw kawei ka sur ban iengtylli shibuit shibor bad ban iatrei lang kum kawei ka jaitbynriew naka bynta u pud u sam, ka Ri bad ka Jaitbynriew. Ki Rangbah shnong naki shnong bapher bapher jong ka Block-1 ruh ki pynpaw kawei ka jingkwah bad kawei ka sur baki kwah ban don beit sha Meghalaya bad ki Kyrpad ruh ïaka Sorkar Meghalaya ba kan shimkhia bha haka ban pynbeit noh kloi ia u pud u sam bad baki jaka puta baroh ki dei beit ban wan sha Meghalaya.