Kyntiew ka WJDSA iaka khusnam song pisa T.1 lakh 50 hajar haka Super Division Football Tournament, Mano ba ai? Pule

Syllad | The Rising MeghalayaNovember 10, 2024

Ka West Jaintia District Sports Association (WJDSA) kala pynbna ba kala kyntiew iaka khusnam song pisa haka Super Division Football Tournament – U Kiang Nangbah Memorial Trophy kaba la iaid shait shait mynta.

U vice president WJDSA Patrick Lamare, ula pyntip ba na kaliang u MLA Jowai Wailadmiki Shylla ula synniang ia kane ka khusnam pisa kaba la kot T.1.50 lak, kaba kynthup iaka lahduh T.1 lakh bad ka lahduh ba ar T.50 hajar.

Kane ka lympung ialehkai mynta u snem la khmih lynti kan shongshit bha ha kaba ki don katto club kiba la theh khambun ka pisa ha kaban thied iaki player bad ban pynlut khambun ka pisa iaki player na ka bynta ka jing kilan jong ki.

Kane ka jia long hadien ba ka Meghalaya Football Association (MFA) kala kyntiew iaka song pisa bad plie lad ar tylli ki sports club na kawei ka synjuk ban ioh iashimbynta kaba la pynshlur iaki ban iashimbynta ban aireng ha ki tournament (kiba ithuh bad iasoh bad ka MFA).

Kane ka jingkyntiew ka WJDSA iaka song pisa kam mut satia ba kan iaryngkat bad ka jingpynlut ki sports club, kadei tang kaba shi troh haba ianujor bad ki song pisa ba ai ka WJDSA ha kine bun bun snem, la ong uwei u riew ieid football bad uba don bynta ha ki kam shnong.

Ula buh jingkylli ruh kumno ka football bad ka standard jong ka kan kiew ha West Jaintia Hills ha kaba ka jingtheh pisa ha kane ka bynta ka duna shaba palat. Kaba eh ruh iaki sports club ban theh pisa iaki player namar ba kiba bun hi ki club ki dei kiba pyniaid da ki shnong kaba ka jingpynlut kam duna iaka 3-4 lak shisnem tang na ka bynta ka sports bad bynrap ba khyndiat eh da ki riew shimet-kata ruh kam dei kaba suk ia u riew shimet ban pynmih pisa ban kyrshan iaki player bad ka por kilan.

Hooid, ym lah ban len ba WJDSA ka shim iaki sienjam kiba har rukom ban pynmih pisa kaba kala hap ban pynlong wat iaka lucky draw (jingkhalai nusip), hynrei hato kane ka pisa kan dap ban pyniaid iaka tournament bapher bapher, ula ong bad bynrap ba ka WJDSA ka dei ka synjuk kaba la rim tam ha rilum Jaintia, hynrei haduh mynta mynne ialade ruh kan dang hap ban shaniah iaki jingkyrshan na kiwei.

Khublei ia u MLA Jowai Wailadmiki Shylla, uba dang samla bad ka jingmut jingpyrkhat kaba kham jynsur, khmih lynti ba un nang theh theh shuh iaka pisa bad ban tei iaki jingtei kiba paka ha Kiang Nangbah Stadium kiba iahap ba ka juk kaba mynta.