Kyntiew kyrdan iaka Seiñraij Secondary School Wahiajer sha ka Higher Secondary

Syllad | The Rising MeghalayaDecember 3, 2023

U Ma Sniawbhalang Dhar, Myntri Sorkar bad u MLA ka Nartiang ula buh ia u maw nongrim na ka bynta ban kyntiew kyrdan iaka Seinraij Secondary School Wahiajer sha ka kyrdan Higher Secondary School haka jingialang kaba long ha kane ka skul ha sngi Saitjain.

Kane ka jingkyntiew kyrdan ia kane ka skul ka long ruh shibynta ka jingrakhe iaka jingdap 25 snem ne ka jubili rupa ka Seiñraij Upper Primary School SSA Wahiajer (1998-2023).

Ha kane ka sngi la iadonlang u CEM JHADC Ma Thombor Shiwat, MLA Jowai Ma Wailadmiki Shylla, MLA Umroi u Damanbait Lamare nalor kiwei kiwei. Ia ka jingialang la pyniaid da u Chairman u Chot Pde.

U Ma Sniawbhalang Dhar haka jingkren ula ai khublei bad iaroh iaka bor pyniaid ka skul kaba la kynjoh ia u mawmer ba Arphew San Snem haka jingiaid lynti jong ka.

Ula ong ba ba kum ki nongmihkhmat ki shem shitom namar ki nongshong shnong kim juh pan iaka jingdonkam jong ki dong ki shnat, hynrei ki pan iaka jingdawa haka kam shimet ka jong ki, bad kane ka buh jingeh iaki nongmihkhmat paidbah ban wanrah iaki kam pynroi haki dong ki shnat. Kumta u la kyntu iaki paidbah ban long kiba iai shah bad pynneh iaka jingtylli haka shnong ka thaw.

Ha kane ka sngi u ma Sniawbhalang ula plie paidbah ruh iaka jaka rieh slap ha ka Khnap Thangbru jong ka shnong Wahiajer.

La pynphuh pynphieng iaka jingiarakhe da ki jingrwai jingshad ba la iashimbynta da ki khynnah skul.