Kyntiew u CM ia ka lama ka Ri ba 40 mitar; Yn pynkylla ia ka Barik point sha ka Unity Park

Syllad | The Rising MeghalayaSeptember 4, 2024

U Myntri Rangbah ka Jylla u Conrad K Sangma ha ka 3 tarik Nailur u la leit ban kyntiew ia ka lama lai rong jong ka ri ha u nar post uba jrong haduh 40 mitar bad pynbna ruh ia ka jingthmu ban pynkylla ia ka Barik point sha ka Unity Park, kata ha ka jaka jong ka Tnad PWD ha Barik, Shillong.

U Myntri Rangbah u la ong, “Mynta ka sngi ka dei ka por kaba kongsan, katba ngi pynher ia ka lama ri kaba jrong bad pynpaw ia ka plan ba kongsan na ka bynta ban pynkylla dur ia ka jaka jong ka Barik”. Kane ka projek ka thmu ban pynitynnad bad pynlong ia ka nongbah Shillong kum ka nongbah kaba kham jyrngam, ha kaba la antad ban pynlut haduh kumba T. 25 klur. La khmih lynti ba kane ka jingtrei kan sdang naduh u bnai Risaw ne u Naiwieng mynta u snem, u la pyntip.

U la ong ruh ba kane ka Unity Park kan pyni ia ka dak jong ka jingiatylli jong ka Jylla bad ka Ri bad ka ban pynpaw ruh ia ki kolshor jong ki jaidbynriew bapher bapher, kynthup ia ki Khasi, Pnar, Garo, Bodo bad kiwei pat ki kynhun jaidbynriew ka jylla.

Nalor kata u la ong ba kane ka park kan pyni ruh ia ki jingshna dur ki ban pyni ia ka kolshor bad ki jaidbynriew bapher bapher kynthup ruh ia ka kolshor jng kiwei pat ki jylla jong ka ri. U la ong ba kane ka park kan long ruh kum ka dak ka jingpynkynmaw ia ka jingiatylli hapdeng ki nongshong shnong ka jylla bad ka ri hi baroh kawei.” U la pyrto ruh ia ka jingiatreilang hapdeng ka tnad Urban Affairs bad ka Tnad PWD ha kaba iadei bad kane ka project ba pawkhmat.

U CM u la pynbna ruh halor ki jingthmu ban wanrah shuh shuh ia ki project ki ban pynkylla dur ia ka Nongbah Shillong hi baroh kawei, da kaba khmih lynti ruh ban lah ban pyndep hapoh jong ki 12 bnai ki ban wan. U la iai ban ruh halor ka jingdonkam ia ka jingiatylli, da kaba kdew ruh halor ka jingia wan lang jong ki trai shnong riewlum na ka bynta ban ioh ia la ka jong ka jylla, bad u kyrmen ruh ba kane ka Unity Park kan long kum ka jingpynkynmaw ia ka jingdonkam ka jingiatylli kaba mynta bad ha ki por ki ban wan kumjuh.

Kane ka project ka ban kot kumba T.25 klur kan kynthup ia ki katto katne ki bynta ba kongsan. Kine ki kynthup ia ki jaka iaid kjat na ka bynta ki paidbah, ka madan, jaka ieng taxi, kali shimet, jaka bam, jaka ialehkai ki khynnah bad ban pyndonkam biang ia ki 9 tylli ki jingtei ba la rim kum ki tourist information centres, souvenir shops, cafes, galleries bad workshops.

Ha kane ka sngi la ia don lang ruh u Myntri Sorkar u Bah Comingone Ymbon, u Abu Taher Mondal, Chief Secretary ka Jylla Bah DP Wahlang IAS, Deputy Commission ka East Khasi Hills Kong RM Kurbah, Director Urban Affairs Department Kong Isawanda Laloo IAS, Kong Idashisha Nongrang, IPS, Director General of Police bad kiwei pat ki ophisar sorkar.