Kyntu husiar u DC ia kiba iaid lyngba ki jingkieng ba la tor ha ka surok bah NH-6 ha EJH

Syllad | The Rising MeghalayaSeptember 10, 2024

U Deputy Commissioner ka East Jaintia Hills, lyngba u kyrwoh u kyntu ia ki paidbah nongleit nongwan khamtam ia ki kali ba kin long kiba husiar bad ban bud ryntih ia ki jingbthah da ki bor pyniaid kali haba ki iaid lyngba ki jingkieng kiba la tor ha ka surok bah NH-6 hapoh ka district.  

Kane ka jingmaham ka la wan long ruh hadien ba la ioh ia ki jingtip ba ki jingkieng kiba don ha ka surok bah NH-6 hapoh ka shnong Tongseng, Sonapyrdi, Pyrtakuna, Umkiang bad Ratacherra kiba hap hapoh Lumshnong C&RD Block ki la tor bad synjor bad kiba buh jingma shibun ia ki paidbah nongleit nongwan khamam ia ki kali kiba iaid lyngba kine ki jingkieng. 

Kumta khnang ban khmih na ka bynta ka jingshngain jong ki nongleit nongwan bad ki kali kiba iaid lyngba kine ki surok la bthah ia u Project Director National Highway Authority of India (NHAI), Meghalaya, Shillong ban shim mardor ia ki sienjam ban maramot ia kine ki jingkieng namar ki dei ki lynti iaid ba kongsan bha na ka bynta ka thain baroh kawei.