Kyntu iatylli ka DS Lapangap lada dang wan pynwit ki Karbi nangne shakhmat

Syllad | The Rising MeghalayaAugust 21, 2023

Ka Dorbar Shnong Lapangap kaba la long haka sngi Nyngkong ka la kyntu jur ia ki shnong ki thaw kiba marjan ba kin iatylli lang kawei bad ban ia mih paidbah lada ka dang don kano kano ka jingpynwit jingpynthud na ka liang ki Karbi nangne shakhmat khamtam ha ki jaka rep ki jaka riang ki jong ki.

Nalor kata ka Dorbar Shnong ka la khang pyrshah ruh ha kaba iadei bad ka leit ka wan hapdeng ki Pnar bad ki Karbi khamtam ia kito kiba leh ia ki kam khaii pateng.   

Kane ka jingshim rai ka la wan long ruh hadien ba ka shnong Lapangap haka 18 tarik une u bnai ka la mad ia ka jingjia ba sngewsih na ka jingwan tur jong u paidbhur Karbi kiba la phut dusmon ia ki tynrai dieng ba la thung da ka jingiarap ka tnat Basin Development naduh u bnai Jylliew ba la dep na ka bynta ban pynjyrngam biang ia ki sawdong sawkun ki lum ki wah kiba la syllen.

Lah ban pynkynmaw ba nyngkong ki nong Karbi kila wan jynrat ia kine ki dieng dei ha u bnai Naitung bad kane ka dei ka sien kaba ar ha ka jaka kaba la tip kum Lum Moo Pyrdet Pynthor kaba hap haka jingsumar sukher ka shnong Lapangap.

Mar ia ioh jingtip halor katei jingthmu sniew jong ki Karbi, kumba shispah ngut ki nongshong shnong ka Lapangap ki la leit her bran bran sha katei ka jaka ban iada ia kitei ki dieng tynrai, hynrei ha kane ka jingpyrshang jong ki nongshong shnong Lapangap ban iada ia ki tynrai dieng na ki Karbi ka la pynlong ia ki ba kin ngat pynban ha ka jingshah ther maw ha ki nong Karbi, hynrei ka long kaba donbok namar ym shym la don satia kiba mynsaw.

Ha kane ka por ka la mih ka thma ktien kaba jur  hapdeng ki nong Karbi bad ki nong Lapangap hynrei la lah noh ban tem noh ia kane ka jingjia na ka jingdon ki pulit na baroh ar liang ki jylla.

Hadien kane ka jingiania kaba la neh kham slem la lah ban pynneh katkum ba long mynta tad haduh bala pynbeit da ki bor district ka West Karbi Anglong bad West Jaintia Hills, ia kaba na ka liang ka shnong Lapangap ka la dep ban ujor naduh u bnai Naitung ba la dep.