Kyntu ka AHAM ia ka jingtuklar jong u PM ka Ri ban kynthup ia ka ktien Garo ha ka 8th Schedule

Syllad | The Rising MeghalayaOctober 25, 2023

Ka Achik Holistic Awakening Movement (AHAM) ka la kyntu ia ka jingtuklar lem jong u Myntri Rangbahduh ka Ri u Narendra Modi na ka bynta ka jingithuh ba mardor ia ka ktien Garo ha ka Khyrnit kaba Phra jong ka Riti Synshar Ri ne ka 8th Schedule.

Ha ka memorandum sha u PM Modi, u president ka AHAM u George Prince Ch. Momin u la ong “Na ka bynta ka seng bad khamtam na ka bynta ki paid nongshong shnong ki jaidbynriew Garo ngi kyrpad jur ban kynthup ia ka ktien Garo kum kawei na ki ktien ban pyndonkam da ka sorkar hapoh ka 8th Schedule bad kyntu ruh ia ka ophis u PM ba kan bishar bniah halor kane ka jingdawa.

Ha kine ki khyndiat snem ba la dep ka sorkar pdeng ka la kynthup ia ki jait ktien bapher bapher hapoh ka ri India ha ka 8th Schedule jong ka Riti Synshar Ri ne constitution lyngba ki jingai jingmut jong ki committee bapher bapher, hynrei ki committee kum ka Pahwa Committee (1996) bad ka Sitakant Mohapatra Committee (2003) ym pat shym la lah ban pynkut ban pyndep ia ki kyndon na ka bynta ban kynthup ia ktien hapoh ka 8th Schedule. Kane ka pynpaw ia ka jingshah liang jong ka sorkar India ban ai ka jingithuh hapdeng ki jingiapher ka jinglong jingman ki jaka bad ki thain hapoh ka ri India.

Ha u snem 2003, la pass ia ka 93rd Constitutional Amendment kaba pynlong ia ka sorkar ba kan lah ban khmih biang halor ka jinglah ban kynthup ia kiwei pat ki jait ktien jong ka ri ban pynrung ha ka 8th Schedule. Hadien la kynthup ia ki sawtylli ki jait ktien, kata ia ka ktien Bodo, Dogri, Santali bad Maithilli ha katei ka 8th Schedule.

“Ngi ki paid nongshong shnong ka Garo Hills ngi la kyrmen skhem ba yn lah ban kynthup ia ka ktien Garo ha ka 8th Schedule da kaba bishar bniah halor ki nongrim kiba shongnia. Kumta ngi kyrpad jur ia u PM ka Ri ba un bishar bniah ha kane ka jingkyrpad ka jong ngi da u juh u lakam ban kynthup noh ia ka ktien Garo ha ka 8th Schedule jong ka riti synshar khadar jong ka ri India,” ong u Momin.

Dang shen na ka liang ka sorkar Meghalaya ka la ai ka jingmynjur ia ka Ktien Garo ban kynthup ia ka 8th Schedule jong ka riti synshar ri ia kaba ngi kyrmen skhem ba ka sorkar India kan ai ka jingmynjur ia kane.

Na ka liang u Momin u la ong ruh ba ka jingdon jong ki nongshong shnong kiba dei ki jaidbynriew Garo ha ka jylla Meghalaya bad katto katne ha ki bynta jong ka jylla Assam, Arunachal Pradesh, Tripura, Nagaland bad kiwei pat nalor katto katne ki nongshong shnong kiba don hapoh Bangladesh ki la pyndonkam da ka ktien Garo ha ka jingim kaba man la ka sngi bad ha ki jingtrei jingktah ki jong ki.