Kyntu ka AJYWO iaka JHADC bad nym ai NOC lynti rel bad iatreilang bad u trai muluk

Syllad | The Rising MeghalayaOctober 3, 2023

Ka All Jaintia Youth Welfare Organisation – Central Body bad East Jaiñtia Zone ka la aiti da ka dorkhat sha u Chief Executive Member jong ka Jaintia Hills Autonomous District Council (JHADC) haka sngi ba Ar ban pynpaw ïa ka jingpyrshah kaba jur ia ka lynti rel ha East Jaintia Hills District bad ban dawa na ka District Council ban nym ai ‘No Objection Certificate’ halor ka jingthmu ka Sorkar Jylla ban pynpoi ia ka lynti rel hapoh ka district.

“Wat hadien ba ka AJYWO bad kiwei kiwei ki sengbhalang ki la thoh da ka dorkhat sha u Myntri Rangbah ka Jylla ban pyrshah ia ka lynti rel hapoh ka District, hynrei ka Sorkar ka dang iai pteng ban pynsngew lyngba ki lad pathai khubor ban pynpoi ia ka lynti rel.” ong u ma Heatermoon Ryngkhlem, President ka AJYWO-EJZ

Ka AJYWO ka la pynpaw, “Naduh u snem 2013 ka seng ka la pyrshah ia ka jingpyrshang jong u Ma Vincent H Pala, u MP ka Shillong Parliamentary Consituency ban wanrah ia ka lynti rel ia kaba la tip kum ka Lanka -Sutnga Railway Line, te haduh mynta ruh ka seng ka dang iai pyrshah ia ka jingthmu jong ka Sorkar Jylla kaba mynta ban wan rah lynti rel hapoh EJHD kat bym pat ioh ia ka ILP lane kiwei kiwei ki aiñ kiba pyrkhing bha ban tehlakam ia ka jingwan laitluid katba mon ki bar jylla sha ka jylla khnang ban iada ia ka jaitbynriew riewlum ba rit paid jong ngi.”

Ka AJYWO, ka la dawa ruh na ka Jaintia Hills Autonomous District Council ban nym ai NOC ia ka Sorkar Jylla ban pynpoi ia ka lynti rel hapoh ka East Jaintia Hills District, bad la kyntu ruh ia ka JHADC ban iasnohktilang bad ki trai ri trai muluk rit paid jong ka jylla hapoh ka District bad ka Jaintia Hills hi baroh kawei ban pyrshah jur ia ka jingthmu jong ka sorkar jylla ban pynpoi lynti rel hapoh ka district kaba ym pat donkam mynta. Na kaliang ka AJYWO kala kyntu ruh ia ka JHADC ban ai jingmut sha ka sorkar jylla ban pyndep bad pynleit jingmut shwa ia kiwei kiwei ki bynta ban tei ia ki jingdonkam kyrkieh jong ka thain ha kaba iadei bad ka roi ka par, kumba la pynpaw ha ka dorkhat jong ka seng kaba la ai sha ka Sorkar Jylla ha kine ki taiew ba la dep. la ong u Reachingson Siangshai, u Secretary General jong ka Central Body.

“U CEM jong ka JHADC, u ma Thombor Shiwat, ula pyntip sha ngi ki nongialam jong ka seng ba haduh mynta ka District Council kam pat ai ia ka NOC ban wan ka lynti rel hapoh Jaintia Hills,” la ong u Reachingson Siangshai.