Kyntu ka All Saints Cathedral ia ka Sorkar ban leh ei ei halor ka jingjia hapoh ka iingmane ha Mawlynnong

Syllad | The Rising MeghalayaDecember 29, 2024

Ka All Saints’ Cathedral, Shillong ka la kyntu ia ka sorkar jylla ba ka dei ban shim ia ki sienjam kiba tyngeh pyrshah ia ki briew kiba donkti halor ka jingjia ba dang shen hapoh kawei ka iingmane Khristan ha ka shnong Mawlynnong, East Khasi Hills District.

U Bishop Purely Lyngdoh lyngba u kyrwoh ba la pyllait ha ka 28 tarik Nohprah u la ong, “Ngi sngewsih jur ia kaei kaba la leh hapoh ka iingmane ha Mawlynnong, bad ngi pynrem jur ia kane. Kane ka la wan jia ruh ha ka por ba ki Balang Khristan bad ki jaka mane blei ha kiba bun ki bynta jong ka ri ruh ki la mad ia kiba kum kine ki jingshah pynthud ha ki jingmane Blei bad ki prokram lyngba ki dkhot jong ki kynhun seng Hindu.”

U la ong ba kawei ka seng Hindu na Assam ka la byrngem ia ka Dorbar shnong jong ki trai muluk kaba peit ia ka krem Mawjymbuin lada kim shah ban leh puja ha kane ka jaka. La iohi kumba kine ki kam ki dei kiba don ka jingiadei mynta ha kylleng ka ri ban pynjur ia kiba kum kine ki jingleh jingkam.

“Kaei kaba la pynlong ia kito ki briew ba kin leh ia kaei kaba ki la leh hapoh ka iingmane ha Mawlynnong ka long kaba bakla shibun. Ka lah ban dei kaba la pynkhreh lypa ban pynpaw ia ki jingleh jingkam bad ki jingbym khein snep ia ki trai shnong riewlum ka thain bad ia ka jingngeit niam jong ki,” ong u Bishop.

U la bynrap ruh da kaba ong, “Ngi kyntu jur ia ka sorkar jylla bad ki bor ba dei khmih jong ka ba kin pynngat pyrshah ia kine ki briew kiba leh ia kiba kum kine ki kam beain khnang ban khanglad ia kiba kum kine ki jingjia hadien habud ha kino kino ki jaka mane Blei.”