Kyntu ka BJP ban maramot ia ki surok ka nongbah Shillong shwa ka lehkmen Khristmas

Syllad | The Rising MeghalayaDecember 15, 2023

U Vice President ka BJP Meghalaya u Wankitbok Pohshna u kyrpad jur ia ka sorkar jylla ba ka dei ban shim khia mardor ban maramot ia ki surok ha ka nongbah Shillong khnang ban pyllait ia ki paidbah na ki jingeh ha ka leit ka wan bad khnang ba ka jinglehkmen Khristmas kan long kaba shnongkun bad lait na ka jingkhnium jong ki paidbah.

Kumba ka long mynta u la ong ba naduh ki nongiaidkai step haduh ki khynnah skul, kiba leit trei leit ktah haduh kiba leit iew leit hat bad kiwei pat kiba iaid ba ieng ha ki surok ha sor Shillong ki mad beit ia ka jingeh namar ka jingsniew palat ki surok.

Kumban shu kdew ba jan baroh ki surok ka sor Shillong bad khamtam eh ki surok ha ka thain Nongthymmai, Garikhana, Demseiniong ki la nang sniew na ka jingtih ka bym i kut shuh kaba la pynthut ia ka leit ka wan jong ki paidbah haduh kala pynlong ia ka tnad traffic ban pyndap hi dalade ia ki thliew kumba la paw ha ki lad pathai khubor khamtam kum ha kane ka por Khristmas kaba dei kawei na ki aiom bakhraw na ka bynta ki khun Khristan ha kylleng ka pyrthei bad kumjuh ha kane ka jylla.

Da kaba shimkhia ia kane, u Bah  Pohshna ula ong ruh “Ngi sngewthuh ba kam long kaba suk ban khanglad ia ka jingsniew ki surok ki lynti syngkien namar ka jylla Meghalaya ka ioh ia u slap ba bun tam ha ka shisnem. Hynrei lada mon hi ka sorkar ka lah ban shimkhia ban saindur janai ia ka rukom shna surok bad ha kano ka rukom yn lah ban lait na ka jingjot khari khari. Ka party BJP, ka sngewdei ba ka sorkar jylla ka hap pynbiang noh da ka kynja song pisa ba la mang lypa ban pynlut marmar ban maramot ia ki surok man ka por haba don ka jingjulor la kadei kaba rit ne kaba heh.”

U la ong ruh ba ka long kaba sngewlyngngoh haduh katta kattta ba kat haduh mynta khamtam hadien ka jingdon jong ki kor ki bor ba thymmai, ka tnad badei peit ia ki surok kam pat don ia ka rukom treikam kaba janai ban khmih bniah ia kum kine ki jingjia khamtam ban lait na ka jingjlan ban ioh jingmynjur na ka sorkar ban maramot ia ki jingjulor kiba rit, namar lada shu ieh ia ki jingjot jingpei  barit, ka lam pynban sha jinglut bun shah lada leh bym suitniew naduh ba sdang.

Shuh shuh u la ong ba kum kawei na ka party kaba long dkhot ha ka sorkar MDA, ka BJP Meghalaya ka long barabor kaba kloi ban iatreilang bad baroh ki party kiba sngew iahap jingmut khnang ba ka jylla kan nangkiew nang bha ha baroh ki liang namar tang da ka jingiatreilang yn sa lah ban pyntikna ba kin  ym don shuh ki thliew ha ki surok nangne shakhmat bad ka leit ka wan ki paidbah kan aram khamtam kum lei ha kane ka por aiom Khristmas.