Kyntu ka BJP ia u CM ban thung ia ka Kong Nongrang kum ka DGP bathymmai ka Jylla

Syllad | The Rising MeghalayaMay 10, 2024

Hadien ba ka UPSC ka la aijingmynjur ban phah ia laitylli ki kyrteng na ka bynta ban shimti ia ka kam Director General of Police (DGP) bathymmai ka Meghalaya, na ka liang ka Seng BJP Meghalaya ka la rai ban leit iakynduh ia u Myntri Rangbah ka Jylla na ka bynta ban aijingmut ia u ban thung ia ka Kong Idashisha Nongrang, IPS (RR – 1992) na ka bynta kane ka post.

Haba kren sha ki lad pathai khubor, u nongaiktien ba halor ka BJP u Bah Mariahom Kharkrang uba dei ruh ia lade u heh pulit IPS ba la shongthait, u la ong, “Ka Kong Nongrang ka dei ka briew kaba biang eh ban shimti ia kane ka kam, kata namar ka dei ruh kaba la kham rangbah tam napdeng ki kyrteng ba la phah bad kaba la don ruh ia ka jingshemphang ha kaba iadei ba ka rukom treikam jong ka Tnat pulit ka Jylla Meghalaya.”

“Ia ki rukom treikam bad ka jingkut jingmut ba skhem jong ka na ka bynta ka kam la tip bha, bad ka don ruh ia ka iktiar bad ka jinglong kaba pynlong ia ka ba kan ioh ia ka jingburom hapdeng ki ophisar bad ki dkhot jong ka tnat pulit hi baroh kawei,” u la bynrap.

Kumta ruh u Bah Kharkrang u la ong, “Ngi la shim ia kane ka sienjam namar ngi ngeit ba ka ophisar kynthei kaba dei ka trai shnong bad kaba la kha bad la heh la san ha Meghalaya ka dei ban ialam ia ka Tnat pulit ka Jylla namar kan kham sngewthuh shibun ia ka jinglong jingman hapoh ka jylla bad kaba long ruh kaba kongsan bha na ka bynta ban pyndep ia ka kamram kum ki pulit.”