Kyntu ka BJP iaka bor district WJH ban pyrkhing ïaka jingbthah ka koit ka khiah ban iakhun ‘Niang Coronavirus

Syllad | The Rising MeghalayaMarch 29, 2020

Ki nongialam jong ka party BJP ha West Jaintia Hills District naduh u Ma Lakhon Biam MDC, u Ma Shaphrang Lyngdoh, President BJP West Jaintia Hills District, u Ma Dawan Lyngdoh MDC, u Ma Moonlight Daw, General Secretary BJP West Jaintia Hills bad u Pramood Kumar Jain ki la leit ia kynduh ia u Deputy Commissioner ka West Jaintia Hills District haka 27 tarik une u bnai halor ka jingdonkam ban tehlakam bad pyntreikam ïaka jingbthah jong ka koit ka khiah bad ka sorkar ban iakhun u ‘Niang Coronavirus.

Ha kane ka jingleit ia kynduh, naka liang ka Party BJP West Jaintia Hills kala ai khublei kyrpang ia u Deputy Commissioner bad ia ka District Administration West Jaintia Hills District hi baroh kawei ba ki la shim khia bad trei shitom shisha ban pynduh ia ka jingiohrung u ne u khniang jingpang Coronavirus hapoh ka District jong ngi, bad ruh ki pyrshang la ka buit ka bor jong ki ban iarap ia ki briew kiba shem jingeh ha baroh ki liang ha kum kane ka por.

Hynrei wat la katta ruh ki briew hapoh ka District jong ngi ki dang ia kynduh ia shibun ki jingeh khamtam sha ki shnong nongkyndong, kum ha ki jingpynpoi ia ki marbam mardih sha ki shnong jong ki, ki dang bun ruh ki briew ki khlem bud ia ki kyndon (guidelines) kumba la bthah ka sorkar naka bynta ban kiar ia ka jingioh ia une u khniang COVID-19.

Ha kane ka jingia kynduh ki nongialam ka BJP Party ki la ai ruh da ka dorkhat sha u Deputy Commissioner, ba kum ki nongialam bad ruh ki nongtrei jong ka party ki la long kiba la kloi ban ai ia ka jingiatrei lang pura katba lah la ka bor bad ruh ban don ha syndah bad ki bor pyniaid District ha kino kino ki jingdonkam kiba ka District Administration ka sngew donkam ia ki.

Shuh shuh ki nongialam jong ka party BJP ki la ong ba naduh ba don kum kane ka jingeh, ki la pyrshang katba lah la ka jong ka buit ka bor ban iarap ia ki briew kiba donkam ka jingiarap bad ruh ban pynsngewthuh ia ki briew ia ka jingdonkam ban bud pyrkhing ia ki kyndon ba la pynbna da ka sorkar naka por sha ka por.

Ha kajuh ka por ki la ong ba kumba ki la pyrshang ban iarap ia ki briew ha ki por ba mynshwa, kin nang iai trei shitom katba lah la ka bor na ka bynta ban pynlait ia ka jingeh jong ki paitbah bad ruh ban pynduh ia ka jingioh rung kane ka khlam COVID-19 shapoh ka District bad ka jylla jong ngi.