Kyntu ka Congress ban kyntait ia ka VPP namar ka Article 371, vote ban pynkhlain ia ka Sixth Schedule

Syllad | The Rising MeghalayaFebruary 1, 2025

Ka Congress ka la kyntu ia ki paidbah ka Rilum Khasi bad Jaintia ba kin kyntait ia ka Seng Voice of the People Party (VPP) namar ka rai ban tynruh na ka bynta ban pyntreikam ia ka Article 371 ha ka jylla Meghalaya lada kan wan ha ka bor.

Haba kren sha ki lad pathai khubor ha ka 31 tarik Kyllalyngkot, u MLA ka seng Congress na Mylliem u Bah Ronnie V Lyngdoh u la ong, ” Phi la iohi ia ka jingkren jong ka VPP ba lada kan wan ha ka bor kin dawa ban pyntreikam ia ka Article 371. Ngam lah sngewthuh namar ban dawa ia ka Article 371 ka long thik kum uto u briew uba ong nga kwah ia ka iing hynrei haba la ioh u la thang noh. Kumta nga kyntu ia ki paidbah ka Rilum Khasi bad Jaintia ba kim dei ban shah ialam bakla bad ba kim dei ban aijingkyrshania kiba kum kine ki party.”

U Bah Ronnie u la ong ba dei ka Congress kaba la ai ia ka Sixth Schedule ia ka jylla Meghalaya. “Haduh mynta, ka khyndew ka shyiap, ka riti dustur bad ka khaii pateng ki dei kiba la aijingiada namar ka jingiohi jngai jong ki nongialam ka Congress lyngba ka Sixth Schedule.”

U la ong ruh ba lada ka Article 371 ka kham khlainbor ban ia ka Sixth Schedule balei pat ba ka Ladakh ka dawa ban pyntreikam ia ka Sixth Schedule hapoh ka thain ka jong ki.

“Kane ka long namar ka jingshisha ba ka Article 371 kan ym iada ia ka khaii ka pateng jong ki trai ri trai muluk. Kumta ruh, ka Sixth Schedule ka dei kaba kham khrawbor haba phai sha ki jingiada ia ki trai shnong riewlum, ia ka khaii ka pateng, ki jaka puta bad kiwei kiwei,” ong u Bah Ronnie haba kyntu ia ki paidbah ban ai ka jingkyrshan kaba pura ia ka Congress ban nangpynkhlain shuh shuh ia ka Sixth Schedule jong ka Riti synshar Ri.”

Haba kylli, une u nongialam Congress u la ther shuh shuh ia ka VPP halor ka jingpyntreikam ia ki sienjam bad ki buit jong ka BJP ban shim kabu ia ka jingngeit niam jong ki paidbah.

“Kaei ka jingiapher hapdeng ka BJP bad ka VPP? Baroh ki shim kabu ha ka jingsngew niam jong ki paidbah. Lada ngi kynnoh ia ka BJP ba ka shim kabu ha ka nongrim jong ka jingsngew niam, ka VPP ruh kadei ban shah kynnoh halor kane kajuh ka sienjam,” u la ong.

“Barabor ngi lah beit ban kam ba ngi ieid jaidbynriew, hynrei ki jingleh jong ngi kim dei ban kren da kumwei pat. Mynta phi kwah ban pynduh noh ia ka Sixth Schedule. Lada ka Article 371 kan wan, ki DorbarShnong kin sa duh sa dam noh. Kumno phi kam ba phi iaid jaidbynriew.Ha kine ki 73 tylli ki snem kiba la leit, ka Sixth Schedule ka la aijingiada ia ngi kumta balei ba ngin pynduh noh ia ka,” u la bynrap.

Ia kane u Bah Ronnie u la pynpaw haba leit ban synran ia ki kyrtong jong ka party kiba leit thep kyrteng ha ka 31 tarik Kyllalyngkot ban iakhun ha kane ka elekshon MDC ka ban wan, kata kaba kynthup ia u Bah Banphiralang Basaiawmoit na Mylliem bad u Bah Manuel Badwar na Laitumkhrah-Malki.

Na ka liang u Bah Banphira u la pynpaw ia ka jingsngew skhem ba ka party kan ioh ia ka jingjop ha kane ka elekshon sha ka KHADC bad ong, “Ngi la trei shtom ban jop ia ka elekshon bad ngi sngew skhem ba ngin ioh ia ka jingjop.”

“Barabor ka long kaba bha haba phi iohi ia ki durkhmat thymmai. Ka dei ka dak kaba bha na ka bynta ka imlang ka sahlang haba ki dur jong ki samla ki wan shakhmat ban tyrwa ia ka jingshakri sha ki paidbah,” u la bynrap.