Kyntu ka Dorbar Shnong Umkiang ban kyntiew kyrdan iaka Umkiang PHC sha CHC

Syllad | The Rising MeghalayaFebruary 16, 2024

Na ka liang u Waheh Shnong ka shnong Umkiang, East Jaintia Hills, u Bah Lasting Pala u la phah da ka dorkhas sha u Symbud Myntri Rangbah ka jylla u Bah Prestone Tynsong ban kyrpad na ka bynta ban kyntiew kyrdan noh ia ka Umkiang PHC sha ka CHC khnang ban lah ban ai ka jingshakri kaba kham bha ia ki paid nongshong shnong bad ki shnong kiba marjan.

Halor kane ka bynta na ka liang ki nongialam shnong kumjuh ka MLA ka thain ka Kong Santa Mary Shylla ruh ki la kyrpad ia ka sorkar jylla ba kan khmih bad shimkhia lem halor kane ka bynta.

“Sa shisien pat ngi pynkynmaw bad kyrpad ia ka sorkar Jylla kumjuh ia ka Tnat ka Koit ka khiah lyngba ka ophis jong phi na ka bynta ban kyntiew kyrdan noh ia ka Umkiang Primary Health Centre (PHC) sha ka Community Health Centre (CHC),” ong ka dorkhas.

Kumba ka long mynta ka Umkiang PHC ka hap ban khmih bad aijingshakri ia palat 16 tylli ki shnong kiba la kynjoh palat 15000 ngut ki nongshong shnong, bad dei tang kane ka jaka aijingsumar kaba don ha ki thain khappud kaba hap ban pynbiang ia ki lad jingsumar sha ki paid nongshong shnong.

La ong ruh ba kin don shibun bah ki jingmyntoi na ka bynta ki paidbah nongshong shnong lada la kyntiew kyrdan ia kane ka PHC sha ka CHC, bad kane kan iarap ym tang ia ki paid ka thain Umkiang hynrei ia baroh ki shnong kiba marjan kiba hap ha ka jingshakri jong ka Umkiang PHC.

Nalor kata la pynpaw ruh halor ka jingdonkam kyrkieh ban pynthymmai ia ki jaka aijingsumar bad kiwei pat ki jingdonkam khnang ba ki paidbah kin ioh pdiang ia ka jingshakri kaba biang ha ka liang ka koit ka khiah bad ka ban pynduna ruh ia ka jingbanbor ba kin hap ban leit sha ki jaka sor na ka bynta ban wad ia ki lad jingsumar.