Kyntu ka Dorbar Waheh Kur iaka JHADC ban thaw kloi iaka aiñ shim kur
Ka Dorbar ki Waheh Kur Ri Jaintia haka 2 tarik Niawieng kala pynlong iaka jingialang ha Iungwalieh ka Dorbar shnong Chillaingraij ban pynbor iaka Jaintia Hills Autonomous District Council (JHADC) ba kan thaw iaka aiñ ban ithuh iaka Kur ka jait kmie.
Ha kane ka jingialang la wan shim bynta da ki president, chairman, general secretary, ki seng kur bad kiwei kiwei.
Hadien ka jingiakren iatai ka Dorbar ki Waheh Kur Ri Jaintia kala shim iaki katto katne ki rai ban kyrpad na u CEM jong ka JHADC ban ithuh da ka ain iaka Kur ka jait kmie haka 6th Schedule katkum ka riti treikam jong ka Ri India bad ban pynrung iaka Kur ka jait Kmie haka riti treikam ka ri India.
La rai ruh ban kyrpad ia u CEM JHADC ban pynkloi ban thaw iaka ain iaki Kur kiba shim iaka Kur ka jait na ka kmie, ki dorbar, ki seng bad ki nongkitkam ka kur kiba la dep ban pynrung iaki kyrteng Kur shaka Secretary Executive Committee jong ka JHADC katkum ba la buh por da ka EC.
La rai ruh ban dawa na ka EC JHADC ban ithuh kloi iaki Kur bad ki Seng/Dorbar Kur kumjuh ki nongkitkam khnang ban phah kloi sha ophis u Deputy Commissioner ka West Jaintia Hills District bad East Jaintia Hills District bad ba kin lah ban ai iaki Schedule Tribe certificate tang iaki Kur kiba la ithuh da ka aiñ lyngba ka JHADC.
Kumjuh ka ophis u Deputy Commissioner East bad West Jaintia ruh kin pdiang iaka NOC na ki Waheh ka Kur kiba la ithuh da ka aiñ kumjuh iaki longkmie kiba ioh kurim khyllah jait kiba pan Schedule Tribe certificate iaki khun ki jong ki.
La rai ruh ban kyrpad na u CEM JHADC ban ailad iaki Kur kiba ki bym pat dep pynrung iaki Kur hapoh ka JHADC.
Nalorkata la rai ruh ban kyrpad ia u CEM JHADC ban kyrpad ia u myntri rangbah ka Jylla ba un thoh sha u myntri rangbah ka ri India ban ithuh tang iaki jaitbynriew Khasi Jaintia bad Garo kum ki trai ri trai muluk katkum ka ain Schedule Tribe bad kiba don hok haka sorkar Jylla.
Facebook
Instagram
Youtube
Twitter
Leave a Reply