Kyntu ka FKJGP ia ka Sorkar ban wad lad ban pyllait noh ia ka ram jong ki nongrep

Syllad | The Rising MeghalayaMarch 19, 2025

Ka Federation of Khasi Jaintia and Garo People (FKJGP) ka la kyntu ia ka sorkar jylla ba kan wad ia ki lad ki lynti ban pyllait noh ia ka ram kaba ki nongrep ki la shim khnang ba kan long ka jingiarap kaba khraw ban lah ban weng ia ki jingeh kaba ki iakynduh.

Ha ka shithi ba la phah sha ka Myntri ka Tnad ka rep ka riang ka Kong Ampareen Lyngdoh ha ka 18 tarik Lber, ka Seng FKJGP Mawkynrew circle lyngba u President u Bah Shakanstar Mynsong ka la ong ba ki nongrep ka thain Mawkynrew bad Mawryngkneng block ki la mad ia ka jingeh namar ka jingbym lah ban siew ia ka ram kaba ki la shim da ki bank namar ka jingkylla ka suinbneng ki jingthung jingtep ki jong ki, ki la iap lut namar ka jingduna ka jingioh slap.

“Kumta ngi kyntu ia ka sorkar jylla ba kan wad ia ki lad ki lynti ban pyllait noh ia ka ram ka ban iarap ban weng ia ki jingeh kaba ki paid nongrep ki iakynduh,” u la ong.

Ka FKJGP ka la pynpaw ruh ba ka jingbym ioh ia ki sboh dawai bad ka jingpulom jong ka sorkar ban pynioh ia ki symbai lyngba ka tnad bad ka jingpynslem ban pyllait ia ka jingiarap pisa sha ki Producer Group (PG) wat hadien ba ki la register lah palat shi snem kynthih ka la ktah jur ia ki paid nongrep ha ka jylla.

“Halor kane ngi kyrpad ia ka tnad ba dei khmih ba kan shimkhia mardor ban weng ia kine ki jingeh,” ong u Bah Mynsong.

Kiwei pat ki mat ba la pynpaw da ka seng ka kynthup halor ka jingdonkam ban sam ia ki tiar synreit dawai, ki symbai bapher bapher kiba seisoh bha, ki jingtip halor ki skhim bapher bapher jong ki nongrep bad ban pynkloi ia ki lad jingiarap pisa sha ki nongrep kiba shah ktah ha ki jingjia pynjulor ha ki bor mariang.