Kyntu ka HANM ia u Myntri ban shimkhia halor ka jingthut ha ka kam sam bording ha Ri Bhoi

Syllad | The Rising MeghalayaSeptember 28, 2024

Ka Hynniewtrep Achik National Movement (HANM) ha ka 27 tarik Nailur ka la kyrpad ia u Myntri ka Tnad Bording u AT Modal ba un shimkhia lem halor ka jingthut ba khah khah ka bording ilektrik kaba la wanrah ka jingeh kaba khraw ia ki nongshong shnong jong ka Ri Bhoi District.

Ha ka dorkhas sha une u Myntri, ka HANM Ri Bhoi District ka la ong ba watla kane ka District ka don ia ka bynta kaba khraw ha kaba iadei bad ka kam pynmih bording ha ka Jylla, hynrei ka dang iai mad ia ka jingeh jingjynjar namar ka jingthut ba khah khah jong ka bording kaba la ktah jur ia ka jinglong jingman bad ia ka roi ka par jong ka thain hi baroh kawei.

Ka HANM ka la ong ba watla ka Ri Bhoi ka la ioh ia ka District kaba pura naduh ka 4 tarik u Jylliew 1992 bad ka Nongpoh kum ka headquarter jong ka, hynrei nduh kine ki snem kiba la leit noh ka jingdon jong ki nongshong shnong ka la nangkiew suki suki bad kaba la nangpynjur ia ka jingdawa ia ka bording ilektrik.

“Kumba ka long mynta, ka Nongpoh ka shaniah beit tang ha kawei ka lain bording kaba 33KV ka Umsning-Jyntru bad ka bym lah satia ban pynbiang ia ka jingeh jong ka District. Haduh palat 400 tylli ki shnong kiba don palat 25000 ki longiing ki la hap ban shaniah tylli ha kane ka jingtei kaba rim, kumta ka donkam kyrkieh ban don ia ka power substation kaba 132 KV ban lah ban pyndap ia ka jingdawa bording bad ban pynduna ia ka jingduh bording kaba khah khah,” ong ka Seng.

Nalor kata da kaba pynpaw ba ka Ri Bhoi District ka dei ka iing kaba don haduh santylli ki power station ne jaka pynmih bording, ka HANM ka la ong ba baroh kine ki jaka ki pynmih haduh 216 MW ka bording, kaba pynlong ia ka Ri Boi ba kan dei ka jaka pynmih bording kaba bun tam ha Meghalaya. Hynrei wat hapdeng kane ka jingnoh synniang, kane ka district khamtam ka Nongpoh ka dang iai bteng ban mad ia ka jingduh bording kaba khah khah. Kine ki jingthut la ong ba hateng ki neh da ki ar, lai sngi lane palat kaba la ktah jur shisha ia ki nongshong shnong bad ia ki jingtrei jingktah baroh.

Shuh shuh ka HANM ka la  pynpaw ka Nongpoh kum ka headquarter jong ka district ka don ia kiba buntylli ki jaka treikam ba kongsan kata kaba kynthup ia ka Ophis  Deputy Commissioner, ka Ophis jong ka tnad Pulit, ka District & Sessions Court, Nongpoh, ka Civil Hospital Nongpoh, ka Nursing Institute ha Pahamsyiem, Ri Bhoi College bad kiwei kiwei ki tnad sorkar bapher bapher,  ki skul, ki bank bad ki jaka treikam. Ka jingthut ba khah khah ha ka liang ka bording ka la ktah jur ia ka jingtreikam jong kine ki jaka   bad ka la ktah ruh ia ki jingshakri paidbah, ka pule puthi, bad ka koit ka khiah bad ha kiwei pat ki bynta.

Kumta na ka liang ka HANM ka kyntu jur ia ka Sorkar Jylla ba ka shimkhia lem mardor khnang ban lah ban wanrah noh ia ka 132KV power sub station khnang ban lah ban pyndap ia ka jingdonkam bording hapoh ka District.