Kyntu ka HITO ia ka Sorkar ban pynjynsur ia ka rta thungkam pulit ha ka Jylla

Syllad | The Rising MeghalayaApril 23, 2024

Ka Hynniewtrep Integrated Territorial Organization (HITO) ka la kyntu ia ka Sorkar Jylla ba ka dei ban pynjynsur ha kaba iadei bad ka rta thep kam pulit ha ka Jylla.

Ha ka dorkhas ba la phah sha u Myntri Rangbah ka Jylla u Conrad K Sangma haka sngi Nyngkong, u President ka HITO u Bah Donbok Dkhar u la ong, “Ngi phah ia kane ka jingthoh ban kyrpad ia phi ba phin pdiang ia ka mat kaba iadei na ka bynta ban pynjynsur ia ka rta ha ka jingthep kam pulit hapoh ka Jylla. Ka jingpynrung kam bad ka jingaplai lyngba ka online na ka bynta ki post ba lait ha ki kyrdan bapher bapher ha ka tnat pulit bad fire department ka dang iaid shakhmat, bad ngi kyntu ia phi ban don ka jingsngew ha kaba iadei bad ka jingpynjynsur ia ka rta.”

Nalor kata u kyntu ruh ia ka sorkar ba kan sngewlem ha kaba iadei bad kito kiba don ia ka jingthrang ban thep kam bad kiba la heh ha ka rta namar ka jingwan sar jong ka khlam Covid-19 kaba la ktah jur ruh ia ka imlang ka sahlang bad ia ka jinglong jingman kaba man ka sngi jong ki paidbah nongshong shnong.

“Kiba bun ki khynnah samla ki don ia ka jingangnud ban aijingshakri ia ka Jylla lyngba ka tnat pulit, bad kin long kum ki nongkamai ha ki iing kiba iaksaid ha ka liang ka ioh kam ioh jam namar ka rta jong ki. Da ka jingpdiang sngewbha ka jong phi halor kane ka bynta, kan long ka jingiarap kaba khraw na ka bynta kito kiba wad jam, bad na ka liang ki paidbah hi kin sngewnguh shibun ia phi bad ia ka sorkar,” ong shuh shuh u Bah Donbok lyngba ka shithi.