Kyntu ka HITO ia ki MLA Jaintia ban pyrshah ia ka jingthmu rah ia ka Nursing School sha Garo

Syllad | The Rising MeghalayaSeptember 18, 2024

Ka Seng Hynniewtrep Integrated Territorial Organization (HITO) West Jaintia Hills ka la kyntu ia baroh ki saw ngut ki MLA ka Rilum Jaintia ba ki dei ban pynbor ia ka sorkar Jylla ba kan pynurlong noh ia ka Nursing School ha Jowai kaba dei ka Nongbah jong ka West Jaintia Hills.

Hadien ka jingiakynduh ia ka Myntri ka Tnad ka Koit ka khiah ka Kong Ampareen Lyngdoh haka 17 tarik Nailur, u President ka HITO u Owansakhi Pasweth u la ong, “Ngi kyntu ia baroh ki MLA ka thain ba kin pynthikna ba ka sorkar Jylla ka dei ban pynurlong ia ka jingkular ban sdang noh ia ka Nursing School ha Jowai.”

Une u nongialam ka Seng u la ong ba ka Sorkar ha u snem 2012 ka la tyrwa ban seng ia kane ka Nursing School ha Jowai, hynrei katkum ki jingtip ba la ioh la ong ba ka sorkar mynta ka la pynkynriah noh ia kane ka Nursing School sha Rilum Garo.

“Baroh ki sawngut ki MLA khamtam u MLA ka Jowai u Bah Wailadmiki Shylla ki dei ban shim ia ka jingkitkhlieh kaba pura halor kane ka mat lada jia ba mih ka jingkhih paidbah lada ka sorkar kan pynkynriah ia kane ka project sha Rilum Garo,” u la bynrap.

Ha ka memorandum u Bah Pasweth u la ong, “Ngi ngeit ba ka Jowai kaba dei ka nongbah hapoh ka district ka don bok ban don ia ka Nursing School khnang ban lah ban pyndap ia ki jingdonkam jong ki samla pule  ka thain kiba don ia ka jingangnud.”

Nalor kata ka HITO ka la dawa ruh ia ka jingtular jong ka Myntri halor ka jingbym biang ki jingdonkam bad ki tiar kiba iadei bad ki lad jingsumar hapoh Jowai Civil Hospital.

Kumjuh ka Seng ka kyrpad ruh ia ka Myntri ba kan shimkhia lem ha kaba iadei bad ka jingduna jong ki nongtrei kaba kynthup ia ki doktor bad ki nos hapoh Civil Hospital bad MCH hospital, bad ruh ban mang ia ka kali kit nongpang na ka bynta ka Seng khnang ban lah ban pynbiang ia ki jingdonkam jong ki nongshong shnong hapoh ka district.