Kyntu ka HPC ia ka Sorkar Pdeng ban tuklar halor ka jingjia bthei bom ha Them Metor

Syllad | The Rising MeghalayaMarch 13, 2024

Ka Harijan Panchayat Committee (HPC) ha ka 12 tarik mynta u bnai kala kyntu ia u Myntri kam Pohiing ka sorkar Pdeng u Amit Shah ba un phah tukalr bad pynlong jingtohkit halor ka jingjia bthei bomb IED kaba la jia ha ka miet sngi Saitjain ha Them Iew Mawlong.

Da kaba pynpaw ba kane ka jingbthei bom ba dang shen ka dei ka jingthmu ban pynpulom ia ka jingiakren ia pynbeit da ka lynti jong ka jingsuk, u Secretary ka HPC u Gurjit Singh u la ong, “Kane ka jingjia kam dei satia kaba shu jia ryngkhat hynrei ka pyni ia ka dak kaba kham  triem ban pynthut ia ka shongsuk shongsain bad ia ka jingshngain jong ki rit paid hapoh ka jylla Meghalaya. Ki jingshah kem ba dang shen halor kane ka jingjia ka long ban wanrah ka jingpyntieng pynsmiej ia ki nongshong shnong kiba shong ba sah ha Them Metor.”

Kumta ruh ka HPC ka la kyntu ia utei u Myntri ka sorkar Pdeng ba un tuklar lem mardor halor ka mat kaba iadei bad ka Them Metor da ki lai kynhun bad ka sorkar Meghalaya, ong u nongialam ka HPC ha ka shithi sha u Amit Shah.

Nalor kata u la ong ruh, “Kamat kaba iadei bad ki hok nongshong shnong da ki briew jong ngi ka dang don hapdeng ka jingbishar hapoh ka iingbishar, ha kaba ka jingpyrshang ka dang iai bteng na ka liang ka sorkar Meghalaya, ka Harijan Panchayat Committee lem bad kiwei pat ki kynhun kiba ia don bynta ban lah ban weng noh ia kane ka jingeh.”

Hynrei u la ong ba wat hadien kiba bun tylli ki jingialang bad ki jingiakren hynrei kane kam shym la poi shano shano ruh, bad wat ka jingtuklar jong ka sorkar Pdeng ruh ka dang iai sahteng kat haduh mynta. “Ngi ngeit skhem ba lada ka sorkar Pdeng kan shim ia ki sienjam na ka bynta ban weng ia kane ka jingeh yn lah ban pynbeit ia kane ka kam khlem jingeh,” ong u Singh.

“Ngi pyntip sha phi da ka jingsngewkhia ba ym shym la don na ka liang ka sorkar Meghalaya, kata na ka liang u Myntri Rangbah bad kiwei pat ki ban pynrem ia kane ka jingjia pynbthei bom kat haduh mynta.Ki nongialam sain hima kiba ju aijingkren pyrshah ia ki nongshong shnong ha Them Metor kim shym la ang wat tang shikyntien ruh lane ban wan jurip sha kane ka jaka ban pynpaw ka jingsngewkhia halor kane ka jingjia lane ban aijingkyrshan ia ki nongshong shnong,” ong u nongialam ka HPC.   

“Kumta ngi kyntu jur ia ka sorkar Pdeng hapoh ka jingialam ka jong phi ban shim mardor ia ki sienjam bad ban leh ia kaba donkam, kata ym tang ban pynlong ka jingtohkit halor kane ka kam thombor ba dang shen, hynrei ruh ban pynshitom ia kito kiba don bynta ha kaba pynshong syier ia ki nongshong shnong kiba dei ki bar jylla.Ngi kyrmen ba ia ka jingsuk yn lah ban wanrah tang lyngba ka jingkloi ban pynshitom ia kito kiba donkti,” u la ong shuh shuh.