Kyntu ka HSPDP ia ka Sorkar MDA ban bteng ia ka jingiakren pynbeit pud bad ka Assam

Syllad | The Rising MeghalayaAugust 15, 2024

Ka Hill State People’s Democratic Party (HSPDP) ha ka 14 tarik Nailar ka la kyntu ia ka Sorkar Meghalaya Democratic Alliance (MDA) ba kan iakren bad ka Sorkar Assam na ka bynta ban bteng biang ia ka wat kaba ar jong ka jingiakren pynbeit pud hapdeng kine ki ar jylla.

Ha ka shithi sha u Myntri Rangbah ka Jylla u Conrad K Sangma ha ka jingiakynduh, u President ka HSPDP u Bah KP Pangniang u la ong, “Ka Seng ka pynpaw ka jingsngewnguh ia ka jingshim rai kaba shlur jong ka Sorkar MDA hapoh ka jingialam jong u Myntri Rangbah ha kaba hynriew tylli ki jaka kiba don hapdeng ki kynrum kynram mynta la slem bah la lah ban pynbeit ha u snem 2022 bad kaba sah ka long ban pynbeit ia ki hynriew tylli ki jaka kiba dang sahteng ha ka wat kaba ar.

“Ka HSPDP ka kyntu ia ka sorkar Jylla ba kan bteng noh mardor ia ka jingiakren pynbeit pud ha ka wat kaba ar bad ka sorkar Assam. Ka party ka sngewnguh shibun ia ka sorkar MDA halor ka jingshimkhia ban pynbeit noh ia kane ka kam iakajia pud kaba dang sahteng la slem bah hapdeng kine ki artylli ki jylla,” u la ong

Haba kren sha ki lad pathai khubor, u Bah Pangniang u la ong ba u Myntri Rangbah u la pynthikna sha ka kynhun ka HSPDP ba un shimkhia kloi katba lah bad ka sorkar Assam khnang ban lah ban noh noh ia ka jingiakren pynbeit pud ha ka wat kaba ar.

Katkum ka jingpynpaw ka jong u, na ka liang u Myntri Rangbah u lah ban iakynduh ia u CM ka Assam hashwa ban sdang ka Dorbar Synrai ka Jylla.