Kyntu ka HYC ban ailad ia baroh kiba thep kam pulit katkum ki post ba la pynbna naduh u 2019

Syllad | The Rising MeghalayaApril 16, 2025

Ka Hynniewtrep Youths’ Council (HYC) ha ka 15 tarik Iaiong ka la leit iakynduh bad aiti ia ka dorkhas ha u Assistant Inspector General of Prisons-Cum-Member Secretary, Prison Recruitment Board bad kyrpad ban ailad ia baroh ki samla kiba la aplai ia ki kam bapher bapher ba la pyllait naduh u snem 2019 ba kin iohlad ban iashim bynta ha ka jingpynrung kam.

Ka HYC lyngba ka dorkhas ka pyntip ha une u ophisar ba ka Board ka la khot aplikeshon na ka bynta ban pyndap ia ki post bapher bapher lyngba ka Advertisement Memo. No. PRI.8/2019/36 kaba la pyllait ha ka 1 tarik Naiwieng 2019.

Katkum katei ka jingpynbna ki la don bun bah ki samla kiba aplai na ka bynta ki post bapher bapher da kaba phah ia ki aplikeshon bad ki jingsiew kumba la kdew ha ka jingpynbna lait kam ne advertisement.

Hynrei, la pyntip sha ka seng ba ka Board kam shym la shim ia kino kino ki lad ban khot pynlong ia ka Physical Efficiency Test, Written Examination lane ia ka Interview na ka bynta kitei ki post kat haduh mynta, bad kane ka la ktah ia ki jingmut jingpyrkhat kumjuh ia ki jinglut jingsep jong ki nong aplai kam. Kane ka jingpynslem kan lam ruh sha ka jingeh  kaba khraw halor ka jingnang iaid ka rta jong kiba bun na ki samla kiba aplai.

Ha katei ka jingiakynduh bad u Member Secretary, la pyntip ba ka jingpynslem ka dei namar ka jingbym lah jong ka Board ban thung ia ka kynhun ne Service Provider ban pyntreikam ia ka TRP (Transparent Recruitment Process) bad ka jingpyniaid ia kane ka kam ka dang iaid shakhmat bad yn sa lah ban pyndep shen. Kumta ka jingpynrung kam na ka bynta ki post bapher bapher kumba la kdew ha katei ka jingpynbna yn sa pynlong long kloi katba lah.

Na ka liang ka HYC ka la kyntu ia u Member Secretary ban pynthikna ba baroh ki samla kiba aplai na ka bynta ki post bapher bapher katkum katei ka jingpynbna ki dei ban ioh ia ka lad ban iashim bynta ha kane ka jingpynrung kam bad ruh ban pyndep ia kane ha ka por kaba biang khnang ba kan ym ktah ia ka lawei jong ki samla bad ia ka lad ioh kam ioh jam.

Shuh shuh ka HYC ka la ong ruh ba kan dang bteng ban buddien halor kane ka phang khnang ban pynthikna ban lah ban pyndep noh kham kloi, bad ka maham ruh ban shim ia ki sienjam ba tyngeh lada ka Board ka dang iai bteng ban pynslem khlem nongrim halor kane ka kam.