Kyntu ka HYC ia ka Sorkar ban pyrkhing ia ki jaka khappud namar ka jingjia ha Bangladesh

Syllad | The Rising MeghalayaAugust 5, 2024

Ka Seng  Hynniewtrep Youth Council (HYC) ka la kyntu ia ka sorkar Jylla ba kan long kaba peitngor bad pyrkhing ha baroh ki shnong kiba don ha ki thain khappud ka India-Bangladesh khnang ban khanglad ia ka jingwan rung jong ki briew kiba na bar khamtam ki nong Bangladesh sha kane ka jylla hadien ki kynrum kynram sain hima kiba lam sha ka jingiaumsnam ha kane ka ri ba marjan.

Ka Seng lyngba u President u Bah Roykupar Synrem ka la ong, “Ngi sngew syier halor ka jingshisha ba ka lah ban don ka jingwan rung beain jong ki briew napoh Bangladesh lyngba ki jaka khappud kiba ioh ban rung ban mih laitluid lane lyngba kiwei pat ki jylla kiba iasam ia ki jaka khappud bad ka Bangladesh ki ban wan phet rieh kum phetwir sain hima ne kiba wad jaka shong lane kum ki nongwan buhai shnong beain.”

“Kumta, ngi kyntu ia ka sorkar Jylla ba kan pyntreikam pura ia ka Directorarte of Infiltrations bad ba kan treikam khlem sangeh ha baroh ki jaka ba kongsan ha ka Jylla, ban iatreilang bad ki bor synshar shnong ban peitngor ia ka leit ka wan jong ki briew ha ki shnong ki thaw jong ki bad ban bthah ia ki police station hapoh ki thain ban peit bniah bha ia ka leit ka wan jong ki briew ha ki jaka kiba ki dei khmih da kaba iatreilang ryngkat bad ki bor pyniaid shnong,” ong u Bah Synrem.