Kyntu ka JAC ia u CEM JHADC ban nym ai NOC sha ka MeECL ban shna dam ha Umngot

Syllad | The Rising MeghalayaJuly 29, 2021

Ka Joint Action Committee Against Umngot Hydro Electric Project kaba kynthup iaki Elaka Darrang, ki nongialam shnong bad ki sengbhalang na Jaintia haka sngi Balang kila ai da dorkhat ha u Chief Executive Member (CEM) Jaintia Hills Autonomous District Council (JHADC) ban kyntu ia u ban nym ai NOC sha ka Meghalaya Energy Corporation Limited (MeECL) ban shna iaka dam ban pynmih bording ha wah Umngot Moosakhia, West Jaintia bad kaba iar ka par shaduh sha East Khasi Hills.

Ha kane ka jingïakynduh ia u CEM JHADC la ïalam da u Dolloi ka Elaka Darrang, bad ki Waheh Shnong jong ki shnong bapher bapher ha Elaka Darrang.

Kane ka kynhun kaba ialam u Dolloi Darrang kala pynpaw ka jingpyrshah kaba jur halor ka jingthmu jong ka sorkar Jylla lyngba ka tnad MeECL ban shna dam ban pynmih bording naka wah Umngot.

U Dolloi ula ong, ka sorkar ka pyrshang ban ïuhroit ïaka hok longtrai jong ki nongshong shnong kiba shong basah sha ki bynta ba sharum ka wah Umngot kiba im bad kamai jakpoh na kane ka wah.

“Lada wan kane ka projek kan ktah ïaki nongshong shnong ka Elaka kumjuh ki marjan shnong kiba im ja kpoh na ka wah Umngot kynthup naduh kiba pynïaid ïaki kam jngohkai pyrthei, ka rep ka riang, ki bri soh bri kwai, ki bri tympew bad ki dohum dohwah kiba don haka wah Umngot,” la ong u Makhraw Ryngksai waheh Dawki.

U Tarson Lymba uba long uwei na ki khun ka elaka bad uba long ruh u President HNYF Southern Riwar Circle, ula ong hapoh ka Elaka ki don lai tylli ki jaka jngohkai pyrthei ne Tourist spot kiba la bna nam haka Jylla kumjuh ka ri India kynthup ka Shnongpdeng, Darrang bad Dawki bad lyngba kine ki lai tylli ki Tourist spot ki khynnah samla kiba ïoh kam ïoh jam kim duna shuh ïaka Ar hajar ngut.

Ula ong ba la juh ïohsngew na ka por sha ka por ba ka sorkar Jylla ka juh pynshlur ïaki samla ban ïeng ha la ki jong ki kjat khlem da shaniah haki kam sorkar hynrei ynda haba ki samla ki la sdang ban ïeng ha la ki jong ki kjat ka sorkar pat ka thmu ban knieh noh iaka lad kamai jong ki da kaba thmu ban sdang ia ka project pynmih bording.

Ka Elaka Darrang baroh kawei ka pyrshah jur ia kane projek pynmih bording bad kila banjur ia u CEM ban bym ai NOC sha ka MeECL.

Nakaliang u CEM ma Thombor Shiwat ula ong ba ha kaba iadei bad kane kam kin nym shim kano kano ka rai kaba kyrkieh bad haduh mynta kam pat don kano kano ka jingkren la nakaliang ka MeECL ne naka sorkar jylla halor ka jingthmu ban tei ia ka dam ban pynmih bording ka MeECL.