Kyntu ka JSM Jowai Circle ia u paidbah ban iatreilang bad ka bor synshar district West Jaiñtia Hills

Syllad | The Rising MeghalayaMarch 27, 2020

Ka Jaintia Student Movement (JSM) Jowai Circle kala kyntu ïaki paidbah ban iatreilang bad ka bor district jong ka West Jaiñtia Hills ban ïakhun bad pyndkut ïa u kynjri jingpur u khniang COVID-19 uba la sar ha kylleng ki ri ka pyrthei bad shim iaka jingim jong ki briew.

Ka JSM hadien ba la pynbna ïaka jingkhang khyrdep ba 21 sngi da u Myntri Rangbah Duh ka Ri bad ka jingpynjari Curfew ha West Jaiñtia Hills naduh ka 24-28 tarik une u bnai, kala kyntu ïa ki dukan bad ki paidbah nongthied nongpet bad ban ryntih iaka jingbthah ka sorkar ban deng iaki jingdeng ba iada iaka khmut ka khmat bad ban pyrshang ban kiar na ki jaka bun briew ne paidbah.

La kyntu ruh iaki kali ban bud ryntih iaka jingpyniaid kali, kaba la pynbna u SP jong ka District ban suk u paidbah ba bun balang.

Ka JSM ka kyrmen ba kan nym mih shuh ki jingjia kumba jia haka sngi Palei bad la kyntu iaka bor district ban ai ki jingtip kiba shai da kaba iatreilang bad ki bor shnong bad ka tnad DIPR ban sam jingtip sha u paidbah halor ki jingpynbna sorkar ba har rukom naduh ka rukom plie bad khang iaki dukan die mar bam khnang ba ka jingthmu ban iakhun pyrshah ia ka jingsaphriang u khniang COVID-19 kan long kaba jop ha kane ka jylla, ong u D.Pde Organising Secretary JSM Jowai Circle.