Kyntu ka JSU ban leh eiei halor ka surok bypass kaba don jingma hapdeng ka shnong Mihmyntdu bad Khliehtyrshi

Syllad | The Rising MeghalayaApril 8, 2025

Ka Jaiñtia Students’ Union (JSU), Jowai Circle ka la aiti ïa ka jingthoh sha u Deputy Commissioner jong ka West Jaiñtia Hills District, ha kaba kala dawa maramot noh mardor ïa ki speedbreaker bad ki divider lane kiba la julor ha shi lynter ka surok NH6 bypass naduh Mihmyntdu (Lumbihsyntu) shaduh Khliehtyrshi. Ka JSU ka la pynpaw ba kane ka bynta jong ka surok ka la nang kham shyrkhei, namar ba ka la sakhi ïa ki katto katne ki jingjia aksiden kaba la wanrah ruh iaka jingiap briew, namar ka jingbym biang ki dak (signage) ha surok bah.

Katkum ka jingong jong ka JSU, ki speedbreaker kiba don ha ka surok ki la julor jur katba nang mih ki sngi, bad ki kali ki ioh ban her sted. Ka divider lane ruh ki la jah kaba buh jingma ia ki nongleit nongwan bad ki kali. Ka jingbym don ki dak surok kiba biang bad ki dak kiba shai ka la nang pynjur shuh shuh ia ka jingma.

Ka JSU ka la kyrpad ruh ïa ka National Highways and Infrastructure Development Corporation Limited ban buh signage thymmai ha ki jaka ba kongsan kiba lah ban jia aksident. Kine ki kynthup ia ki jaka ba don hajan ka Civil Hospital ha Ialong, ka bypass point ha Lumbihsyntu ha Mihmyntdu, bad ka surok kaba don hajan ka Woodland WK Hospital ha ka shnong Sabahmuswang. Kine ki jaka ki dei kiba bun bha kali bad iaid sted ki kali bad donkam ban shim iaki sienjam ban ïada ïa ki jingim.

Nalor ki lad jingïada ïa ka jingstet, ka JSU ka la kyntu ïa ki bor synshar buh iaki signage ha surok ba dei ban buh ha baroh kawei ka jaka ban ïarap iakiki nongleit nongwan bad ban pynduna iaki jingjia ba sngewsih ha lynti syngkien.