Kyntu ka JSU ia ka DGP ban pynkhlain ia ki bor pahara khappud bad ban tehlakam ia u drok

Syllad | The Rising MeghalayaJune 3, 2024

Ki nongialam jng ka Seng Jaintia Students Union (JSU) ha ka 3 tarik mynta u bnai ka la kyntu ia ka jingtuklar lem jong ka Director General of Police (DGP) ka Jylla, ka Kong Idashisha Nongrang ha kaba iadei bad kiba bun ki mat kaba kynthup halor ka jingpynkhlain ia ki Border Police Outposts (BOP) bad ha ka jingiakhun pyrshah ia u drok bad kiwei pat ki jait jingdih pynbuaid.

Ha ka dorkhas ba la ai sha ka DGP, ka Seng ka la ong ba baroh ki BOP ha Meghalaya khamtam ha Jaintia Hills kiba la sakhi ia kiba bun tylli ki jingjia jong ka jingiakynad ha ki por kiba la dep ki donkam ban pynkhlain, kata da kaba kynnoh ruh ba ki la don ki jingjia shah thombor bad ka jingshah pyniap jong ki trai shnong ha ki briew napoh Assam.

Ka Seng ka pynkynmaw ruh ba ka sorkar ha u bnai Naiwieng 2022 ka la tyrwa ban buh ia ka BOP ha ki hynniew tylli ki jaka kiba mih khah khah ki jingiakajia. Kine ki kynthup hapoh ka shnong Mukroh bad Tihwieh ha West Jaintia Hills, Mooriap ha East Jaintia Hills, Rani-Jirang ha Ri-Bhoi district, bad Umwali, Lejadubi bad  Langpih ha West Khasi Hills.

Nalor kata ka Seng ka la aijingmut ruh halor ka jingdonkam ban pynbha ia ki jingtei ha ki outpost khamtam ha Mukroh bad Khanduli namar mynta kine ki artylli ki outpost ki dei kiba la shu tap da ki tin kaba buh jingma shibun ia ki bor pulit, kata wat hadien ba kane ka jaka kaba la buh ia ka outpost ruh kam dei ka jaka kaba la long trai pura.

Halor ka jingdonkan ban pynkhlain ia ki sienjam ha ka jingiakhun pyrshah ia u drok ha ka Jylla, ka JSU ka la ong, “Ngi sngewnguh shibun ia ki bor pulit ka Jylla halor ki sienjam kiba ki la shim ban tehlakam ia ka jingwan rung jong u drok shapoh ka Jylla. Hynrei, ki dang don hi ki jaka ha kaba u drok u dang ioh ban wan rung laitluid.Ngi kyrpad ia ka Tnat pulit ba kan pynkhlain ia ki pulit iakhun pyrshah drok hapoh East Jaintia Hills, namar ka la kylla long ka lynti rung ba kongsan na ka bynta u drok sha ka Jylla. Ngi la aijingmut ruh ba ki bor pulit kin iatreilang bad ki kynhun treimon sngewbha, ki sengbhalang bad ki dorbar shnong ban tehlakam ia ka jingwan rung jong u drok. Donkam ruh ban pynlong ia ki jingpynshai paidbah pyrshah ia u drok ha ki jaka iew, ki shnong ki thaw, ki sor rit bad ha ki jaka pule puthi.”  Ha kajuh ka por ka JSU ka la kyrpad ruh na ka bynta ban pynlong ia ka jingpynrung kam pule hapoh Jaintia Hills.

“Ngi la kyntu ban pynlong ia ka jingiamareh bad ia ka eksam kam pulit hapoh Jaintia Hills namar kane kan pynsuk ia ki samla ka thain kiba shem jingeh ban wan shaduh sha Shillong. Kiba bun na kine ki samla ki dei kiba wan na ki thain nongkyndong bad kiba duna ha ka liang ka ioh ka kot, bad ka jinglut jingsep ha kaba iadei bad ka leit ka wan kan ktah jur lada kin hap ban wan shaduh sha Shillong. Kumta ruh ngi aijingmut na ka bynta ban pynbiang ia ki jingdonkam ha Jaintia Hills na ka bynta ka jingmyntoi jong ki samla , kata da kaba kdew ruh halor ka jingkhapngiah lypa hapoh ka nongbah Shillong.”

Da kaba pynpaw halor ka jingdonkam ban buh da ka helpline number kaba treikam baroh 24 kynta na ka bynta ban aijingkyrshan ia ki longkmie, ki khynnah kiba ioh lait im bad ki lanot nalor kiwei pat ki kam thombor, ka JSU ka la kyrpad ruh ia ka DGP ba kan khang khyrdep noh ia ki khyrdop bad ki rukom lum pisa ba beain kiba ktah jur ia ki nongrep bad ki nongkhaii.

“Ki don shibun ki khyrdop ba beain ba la pynieng ha kylleng ki surok ha kaba ki kynhun riew shimet ki ju lum pisa na ki kali kit ia ki mar rep bad kiwei pat ki mar ba la pynmih da ki trai shnong kum u synsar, mawthup, kwai tyrkhong bad u tympew.” Ka Seng ka la ong ba kine ki kam beain ki la ktah jur ha kiba bun ki liang, kata ia ka ioh ka kot ha ka imlang ka sahlang namar ka jingkiew dor jong ki mar ki mata ha ki iew ki hat ka ktah ruh ia ki paidbah ka jylla khasmtam ha ki thain nongkyndong.

“Kumta ngi kyntu jur ba phin shim mardor ia ki sienjam ban ithuh bad ban pynpra ia ki khyrdop beain bad ban pynlong ruh ia ki jingtohkit kiba bniah bad ban pynshitom ia kito kiba donkti bad ruh ban pynthikna ba ki nongkhaii trai jylla kim dei ban shah ktah,” ong shuh shuh ka seng JSU.