Kyntu ka JSU ia u Myntri Sorkar ban wanrah da ka ‘Drug Addiction Rehabilitation Centre’ ha East Jaintia Hills

Syllad | The Rising MeghalayaOctober 22, 2023

Namar ka jingsngewkhia halor ka jingnangkiew ha ka jingdon jong ki khynnah kiba kyrni ha ka jingpyndonkam drok hapoh East Jaintia District, ka seng Jaintia Students Union (JSU) ka la phah da ka dorkhat sha u Myntri ka Tnat Social Welfare ka Sorkar Jylla u Bah Paul Lyngdoh ha kaba ka la pynpaw ia ka jingdonkam kyrkieh ban wanrah da ka ‘Drug Addiction Rehabilitation Centre’ khnang ban lah ban iarap ia kiba kum kine ki khynnah kiba la ngat ha kane ka jingeh.

Ka JSU ha u kyrwoh lyngba u Bah Livingson Sama President bad Ajoymeson Lyngdoh Secretary ki la pynpaw ba ka jingeh namar ka jingnangkiew ha ka jingdon jong ki nongpyndonkam drok hapdeng ki khynnah samla kam dei shuh ka jingeh kaba dang thymmai hapoh ka East Jaintia Hills District.

Hynrei, katba nang iaid ki sngi ki por kane ka district ka la kylla long kaba hakhmat eh halor ka jingdon jong ki khynnah samla kiba pyndonkam drok ha ka jylla hi baroh kawei, bad kaba kham sngewkhia shuh shuh ka long ruh namar napdeng kine ki nong pyndonkam drok kham bun ki dei ki khynnah kiba dang khie samla.

Ha ka jinglap jong ka JSU la ong ba ki khynnah ha kine ki snem kiba mynta la iohi ba ki la leh ngiah bad thait ban pynleit jingmut ha ki jingpule, ha ki kam ialehkai sports bad ha kiwei pat ki bynta kiba tei ia ka jingim.

Kumta khnang ban lah ban tehlakam ia kine ki jingeh, na ka liang ka JSU ka kyrpad jur ia ka sorkar lyngba une u Myntri ba dei khmih ban shimkhia lem khnang ban lah ban wanrah noh da ka ‘Addiction Rehabilitation Centre’ hapoh ka district khnang ba kito ki longiing kiba kham duna ha ka liang ka ioh ka kot kin lah ban kotbor lyngba kane ka jaka aijingiarap.