Kyntu ka KHADC ia ka Sorkar ban pan jingmut shwa ban pyntreikam ia ka MSIPF Act, 2024

Syllad | The Rising MeghalayaDecember 19, 2024

Ka Khasi Hills Autonomous District Council (KHADC) ha ka 19 tarik Nohprah ka la mynjur ia ka rai ban kyntu ia ka sorkar Jylla ba kan pan jingmut na ki kynhun bapher bapher hashwa ban pyntreikam ia ka Meghalaya State Investment Promotion and Facilitation Act, (MSIPF) 2024.

Haba wanrah ia kane ka rai, u Chief Executive Member (CEM) ka KHADC u Bah Pyniaid Sing Syiem ula ong, “Ka jingtyrwa ban pynkylla ia ka MSIPF Act, 2024, ka ban ailad ia ka IMA ban thied jaka bad ai jaka sha ki nongseng kam kan ia tyngkhuh bad kiba bun ki kyndon jong ka Khasi Hills Autonomous District (Regulation and Administration of Land) Act, 2021 bad kan ktah ia ka jingsngew jong ki paidbah babun balang.”

“Kumta ka iingdorbar ka la rai ban kyntu ia ka sorkar Meghalaya ba kan pan ia ki jingai jingmut lyngba ki jingiasyllok bad ka Council lem bad ki kynhun bapher bapher hashwa ban pyntreikam ia kane ka Act,” u la ong.

U CEM u la kdew ruh ba ka Riti bat khyndew jong u Khasi kaba don ha ki Dorbar Shnong, Dorbar Raid, Dorbar Hima ka dei ka rukom treikam kaba bha tam kaba la pynneh pynsah ia ka jinglong kyrpang jong ka jaidbynriew Khasi.

Ka KHADC kumba la pynkup bor da ka Sixth Schedule jong ka Riti synshar Ri ka dei ban iada bad pynneh pynsah ia ka riti bat khyndew jong u Khasi hapoh u pud u sam jong ka.Ki bor synshar shnong synshar hima ki dei ki bor treikam kiba don ia ka bynta kaba khraw ban aijingiada ia ka riti dustur, ki jingpyndonkam bad ka rukom bat khyndew jong ka jaidbynriew Khasi.