Kyntu ka Kong Bindas Syiem ia u Dy.CM ban ai ka jingpynthikna halor ka surok Nongpoh-Umden sha Sonapur
Ka Kong Bindas Syiem ka la ong ba kan bteng ia ka jingiakhih shah thngan jong ka tad haduh ban da ioh ia ka jingkular kaba pynhun lyngba u Symbud Myntri Rangbah ka Jylla uba khmih ia ka Tnat PWD (Roads) u Bah Prestone Tynsong ha kaba iadei bad ka jingdawa ban shna pynbha ia ka surok Nongpoh-Umden sha Sonapur kaba la jot rathai.
Kane ka longkmie ki laingut ki khun ka la pynpaw ia kane ha ka 8 tarik Jylliew hadien ba ka la sdang ia kane ka jingiakhih shah thngan naduh kine ki lai sngi ba la dep ban dawa pynbha mardor ia katei ka surok.
![](https://www.syllad.com/wp-content/uploads/2024/09/JIT-Vacancy-823x1024.avif)
“Nga kwah ia u Symbud Myntri Rangbah ka Jylla uba khmih ia ka Tnat PWD (Roads) ba un ai da lade hi ia ka jingpynthikna namar ba u don ia ka bor ban leh,” ong ka Kong Bindas kaba dei ka nongshong shnong jong ka shnong Umden, Ri Bhoi District lyngba ki lad pathai khubor.
Shwa kane, na ka liang u MLA ka Nongpoh u Bah Mayralborn Syiem u la iakynduh ia kane ka longkmie bad kyrpad ba kan sangeh noh ia kane ka jingiakhih namar na ka liang ka Sorkar ka la pynthikna ba ka jingpynkhreh ban shna ia kane ka surok ka la iaid shakhmat.
“Watla katta, Ngan ym shaniah lada u MLA lane u enjiniar ka PWD kin ai ka jingpynthikna. Watla nga sngew tlot, hynrei ngan pat long lakloi ban sangeh ia kane ka jingiakhih tad haduh ba u Symbud Myntri Rangbah un ai ka jingpynthikna hakhmat ki paidbah bad ruh ban kdew ia ka por ban pyndep ia kane ka surok,” ka la ong.
Ka Kong Bindas ka la ong ba ka la ngiah ia ki jingkular thok kiba ki la khlei ha ka por ilekshon.
“Kito kiba jop bad rem ha ki ilekshon ki la kular ban pynioh ia ngi ia kane ka surok, hynrei ka la kylla long tang ka kam thok kam shukor. Namar kane ka daw, Nga la ngiah bad kdang, kata khamtam namar ia lade shimet Nga la iakynduh shibun ki jingeh namar ka jingsniew jong kane ka surok. Kumta ruh Nga sngew ba nga don ia ka hom ban dawa ban pynioh ia ka surok kaba bha,” ong shuh shuh kane ka longkmie.
Leave a Reply