Kyntu ka KSU East Jaintia Hills ban ai jingiarap mar mar sha ki lanot shah lynshop bor mariang

Syllad | The Rising MeghalayaApril 3, 2024

Ka Khasi Students’ Union (KSU), East Jaintia Hills District Unit kala kyntu ia u Deputy Commissioner, East Jaintia Hills District ban pynkloi ban pynioh iaki lad jingiarap sha ki lanot shah lynshop bor mariang hapoh ka district.

Ka KSU halor kane kala ai da ka dorkhat sha u DC East Jaintia Hills haka 2 tarik Iaiong haka jingialam u president KSU East Jaintia Hills District Streamly Suchen bad general secretary Kwilinis S Suchiang. Haka dorkat ka KSU kala pynpaw ba bun bah ki jingujor ka la ioh ha kaba da ki snem ki lanot ki khlem pat ioh iakane ka jingiarap.

Ka KSU kala ai jingmut ba Disaster Management Relief Fund ka dei ban pynkloi ban pynioh iaki lad jingiarap sha ki lanot shah pynjulor haka bor mariang.

Ha kawei pat ka dorkhat kaba la ai ka KSU sha u DC ka dei halor ka lad iohkam ne ka job placement iaki samla kiba la dep pyntbit ialade na ka ITI Khliehriat ka ban sa sdang noh. Ka KSU kala ai jingmut ia u DC ban soi ka jingiakut MOA bad ki company kiba don ha ka district ha kaba kine ki karkhana ki dei ban pynrung iaki samla ym ban duna 5 -10 shi snem ha kawei ka company iaki samla kiba pyntbit haka kam wielding, technician, mechanical bad kiwei kiwei na ITI Khliehriat.

Ka KSU kala kam ba na kaliang u DC ula ong ba halor ka relief fund na bynta ki ba shah ktah ha ka bor mariang u la ong ba ki ialeh ban ai mar mar katba lah. Ula pyntip ba ka district ka la don lypa ruh ka pisa kaba 20 lakh eiei ha kaba lyngba kane yn ioh ban iarap mar mar ia kiba lah shah ktah jur eh khamtam kiba don ka jing duh noh iala ka jingim ha ka bor mariang.

Ka KSU kala ong ba u DC ula kubur ba ka don jingslem ban pyllait iaka relief fund ha ki snem ba la leit, namar ba ka pisa ba la mang ka wan lyngba ka revenue department bad ka district administration kam pat ioh ka bor ba pura ban ai beit mar mar iaki relief fund sha ki lanot, hynrei mynta ka kynti ka lah pher ka rukom pyniaid bad mynta ka la lah ban kloi na kadaw jong ka jingioh bor u DC jong ka district ban ai mar mar iaki lad jingiarap.

Ka KSU kala kyntu ia ki paidbah ba haba don kino kino ki ba ngat iaki jingjia shah pynjulor mariang ki dei ban ujor FIR mar mar halor ka jingshah lynshop bad ruh ki dei ban ioh ruh ki syrnot pynjulor (damage certificate) na ki bor ba dei peit lane ki Rangbah Shnong bad ruh kin hap ring da ki video bad shon dur iaki jingjulor bad phah mar mar sha ki bor ba dei peit. Ka KSU kala kyntu iaki paidbah ban long kiba husiar ha kum kane por bala sdang ka aiom slap bad lyer bad lada don kino ki jingjia ki lah ban pyntip ruh sha ka seng.