Kyntu ka KSU ia ka Committee kaba pynbeit ia ki kam ka MPSC ban kynthup ia ki 20 tylli ki mat jingdawa

Syllad | The Rising MeghalayaApril 4, 2025

Ka Khasi Students Union (KSU) ha ka 3 tarik Iaiong ka la kyntu ia ka Committee kaba khmih na ka bynta ban wanrah jingkylla ha ki rukom treikam ka MPSC ba kan kynthup lang ia ki 20 tylli ki mat jingdawa khnang ban pynthikna ia ka jingtreikan kaba shai bad ka jingthungkam kaba khuid ba suba, kata ha ka jingai jingmut ia kaba yn sa aiti shen sha ka sorkar Jylla.

Ha ka shithi sha u Commissioner & Secretary bad Chairman ka Committee u Bah FR Kharkongor, ka KSU ka la ong, “Ka Seng ka kyrpad rit na ka bynta ban kynthup lang ia ki 20 tylli ki mat jingdawa ba la kdew da ka seng bad ba kine ki mat ba la kdew bad kiba dei ban pdiang kin lah ban wanrah ia ka jingkylla ha ka rukom thungkam thungjam ha ka jylla.”

Haba kdew halor kine ki 20 tylli ki mat jingdawa, ka Seng ka la ong ba ka MPSC ka dei ka bor ba hakhliehduh ha ka Jylla ha kaba iadei bad ka thungkam thungjam, hynrei ka duna pat ban don ia ki kyndon jingbthah bad ka jingpyndonkam ia ki kor teknologi bad ka jingdonkam ban wanrah jingkylla.

Ka jingthaw ia kane ka Committee ka dei ka sienjam ka ban lam sha ka jingpynthymmai bad ka jingkylla. Hynrei ia mynta ha Meghalaya ki don ruh sa kiwei pat ki recruitment board kiba don ia ki policy kiba kham sniew shuh shuh bad ki bym khuid ne don jingkitkhlieh. Kine ki recruitment board kim dei kiba shah ialam ha kino kino ki kyndon ain bad ki treikam ha la ka jong ka man.

Nalor kata ki don ruh ki tnad kiba pynlong ia la ki jong ki jingpynrung kam, interview khlem kino kino ki kyndon ain ne ka jingsheptieng ne jingkitkhlieh.

Ka KSU ka kdew ruh ia ka Medical Service Recruitment Board (MMSRB) kum ka nuksa bad ong ba ha u bnai Nailur 2024, ia ka result jong ki 164 ngut ki staff nurse ba la pynbna da ka Board ka dap satang ki jingbakla suba. Ki la don bun tylli ki result ba la pynmih bad kiba dap da ki jingbakla bad jingduna. Ki jingkylli, ki jubab (Answer Keys) ki dei kiba don jingbakla, bad ha baroh ka jingpynrung kam ka long kaba kynrum kynram.

Na ka liang ka seng ka hap ban tuklar ia kane ka kam bad haba khmih bniah ka la shem ba kam shym la don kano kano ka recruitment rules ne regulations, ki dkhot jong ka Board ki dei kiba la khlieh da ki ophisar sorkar, katba ia ki kam ki kam la shu bynshet sha ki doktor jong ka DHS ki bym dei ki riew shemphang ha ka bynta kaba iadei bad ka jingpynrung kam bad kiba la dei lypa kiba la ban khia ha la ki jong ki kam ki jam.

Ka KSU ka sngew ba haba thaw ia kano kano ka recruitment board, dei ban shim kongsan halor ki kyndon jingbthah, ki rule, rukom pyniaid bad kiwei pat lem kumta kan long ka bym pynioh ia ki hok jong ki nongaplai ne kiba don jingangnud bad ka ban lam sha ka jingbamsap bad ka jingshah liang.

Kumta ruh ka Seng ka kwah ban aijingmut bad ki jingbthah ki ban wan lyngba kane ka Committee ki dei ban treikam lang ha ki recruitment board lada shem ba ka long kaba myntoi ban bteng bad kumjuh ruh ia ki District Selection Committee khnang ba kan long kaba ryntih ha kaba iadei bad ki kyndon thep kam bad ba kan ym don kano kano ka jingbym biang ha ka rukom jied. Ka KSU ka la aijingmut ruh ba ia ka jingpynrung kam ym lah ban leh hi da ka tnad hynrei da ki bor kiba dei khmih kiba shemphang bad kiba bit na ka bynta kane ka kam khnang ban kiar na ka jingshah liang bad ka jingbamsap.

Nalor kata ka Seng ka pynpaw ruh ba ka bai ialeh eksam ba la khot pynlong da ka MPSC, DSC bad kiwei pat ki recruitment board ka long kaba rem. Ki nongaplai ki hap ban siew haduh T.500 ne palat na ka bynta kano kano ka kam kaba ki aplai.

Katba ha ki jingthep kam jong ka Central Recruitment, ka don ka jingpynduna ia ka bai ialeh eksam na ka bynta ki Scheduled Tribe lane ym donkam ban siew pisa, katba ki eksam jong ka jylla kiba bun ki dei ki Scheduled Tribe ka jylla hynrei la shim da ka dor kaba rem. Ka Seng ka la aijingmut ruh ba dei ban don u pud halor ka jingbuh ia ka dor na ka bynta ki nongialeh eksam da ki nongaplai khnang ba kan ym ktah i kito kiba wan na ki longiing kiba duna ha ka ioh ka kot bad khnang ba kan ym khanglad ia ki ba kin ioh ban aplai kam,.

Kumjuh ka Seng ka pynpaw ruh ba ki briew kiba don jingduna ha ki dkhot met kim ioh satia ia ka jingkyrshan na ka sorkar ha kaba iadei bad ki lad iohkam ioh jam. Watla ki don ka jingbhah kyrpang na ka bynta jong ki ha ki tnad sorkar, hynrei kam shym ladon pat kano kano ka kyndon jingbah ka ban ailad ia kiba kum kine ki briew ba kin ioh ban ialeh ia ki eksam.