Kyntu ka KSU ia ka jingtuklar u Dy CM halor ka jingjulor ka surok NH-06, dawa tnad traffic ha East Jaintia Hills

Syllad | The Rising MeghalayaSeptember 18, 2023

Ka Khasi Students’ Union (KSU) haka sngi Nyngkong ka la dawa ia ka jingtuklar lem jong u Symbud Myntri Rangbah ka jylla uba khmih ruh ia ka Tnat PWD (Roads) u Bah Prestone Tynsong ha kaba iadei bad ka jingjot rathai jong ka surok National Highway-6.

Ha ka memorandum sha une u Myntri, ka  KSU-EJHD Unit lyngba u president u Streamly N Suchen ka la ong ba la jan hynriew taiew naduh ba ki heh jong ka tnat National Highway Authority of India (NHAI) ki la pynthikna ban sdang maramot noh ia kane ka surok NH-6 kaba la jot rathai, hynrei haduh mynta ruh kam pat shym la don satia kano kano ka jingpyni dak.

U la ong ruh ba ki thliew ki syar, ki jingorpait bad ka jinglong jong ka surok ym tang ba ka la wanrah jingeh ia ki nongleit nongwan hynrei ka wanrah ruh ka jingjulor ia ki kali bad ki jingjia tyngkhuh kali ba khah khah.

Ha ka jingshisha u la ong ba kum ka surok ba kongsan kaba pyniasoh ia ki jylla ba kongsan jong ka thain shatei lammihngi (Northeast) bad ka jingduh ba shyrkhei ha ka liang ka ioh la kot lada ym shim khia ban pynbha ia kane ka sruok NH-6, kata nalor ka jingpynthikna ha kaba iadei bad ka jingshngain jong ki paidbah nongleit nongwan.

Kumta ruh ka KSU ka kyntu ruh ia une u Myntri ba un tuklar lem mardor ban pynkloi ban phah maramot noh ia kane ka surok bad pan ruh ia ki jingtip kiba bniah ha kaba iadei bad kane ka bynta. Ka KSU kala kyntu ruh ia ka sorkar ba kan aijingtip halor ka mangtyngka ba iadei bad ka jingmaramot ia kane ka sruok bad halor ka jingpynlut ban maramot ia ka khnang ban pynthikna halor ka jingbha bad ka jingneh jong kane ka surok.

U Streamly N Suchen u la ong ruh ba ka KSU kan jin da la pyrto lada ka sorkar kan lah ban kdew halor ka por ban pyndep ha kaba iadei bad ka jingmaramot ia kane ka surok bad halor ka jingbha bad ka jingneh ka jong ka khnang ban lah ban kyntiew ha kaba iadei bad ka roi ka par hapoh ka thain. Nalor kata ka KSU ka la kyntu ruh ia ka sorkar ba kan khmih bniah halor ka jingdonkam kyrkieh ban don iaka tnat traffic hapoh East Jaintia Hills.

Ka KSU ka la ong ba wata na ka liang ka sorkar ka la shim ia ki lad ki lynti ban weng ia ki jingeh kiba iadei bad ka leit ka wan ha ki district bapher bapher, ka jingbym don ias ka tnat traffic hapoh EJH ka la pynmih ia kiba bun ki mat kiba wanrah ka jingsngewkhia na ka bynta ki nongshong shnong jong ka thain.

“Ka jingkiew sted ha ka jingbun briew bad ki jingtreikam bapher bapher hapoh ka district ka la wanrah ka jingeh ha kaba iadei bad ka leit ka wan jong ki kali, bad ka jingbym don ia ka tnat traffic kaba biang ka la wanrah ka jingkhapngiah ha ki lynti surok ba kongsan bad kaba pynthut ia ka leit ka wan jong ki kali bad ki riew paidbah.