Kyntu ka KSU ia ka Myntri ban tuklar halor ka rukom thungkam Nurse hapoh NEIGRIHMS

Syllad | The Rising MeghalayaDecember 22, 2023

Ka Khasi Students’ Union (KSU) haka 21 tarik Nohprah, kala kyntu ia ka Myntri ka Tnat ka koit ka khiah ka sorkar Jylla, ka Kong Ampareen Lyngdoh ba kan tuklar ha kaba iadei bad ka jingthungkam ba dang shen hapoh ka North Eastern Indira Gandhi Regional Institute of Health and Medical Sciences (NEIGRIHMS).

U president ka KSU u samla Lambokstarwell Marngar ha ka shithi sha ka Kong Ampareen,  ula ong ba haka 25 tarik Nailar 2023, ka Hospital kala pyllait ia ka jingpynbna laitkam Nursing Officer 194 tylli da ka AIIMS New Delhi lyngba ka NORCET-5 ha kaba 175 tylli ki kam la mang na ka bynta ki shynrang bad 19 na ka bynta ki kynthei hynrei kaba la pynbitar ia ka seng ka long namar ki don tang 15 ngut kiba dei ki trai shnong riewlum ka Jylla kiba la shah jied.

U nongialam ka KSU u la ong ruh, “Ka Nursing ka ju dei ka kam ba ju trei bha khamtam da ki kynthei naduh kaba sdang ha kaba ka jingdon jong ki nongtrei kynthei bad ki shynrang ka long da 80:20, hynrei ka long kaba sngewsih ban iohi ba ka long pynban markhongpong hapoh NEIGRIHMS.” U la ong ruh ba kine kiba la shah jied ki dei ki bym pat don jingtbit ha ka jingtrei ia ka kam bad kiba shu pyndep ia ka eksam na ki jaka pule khlem kano kano ka jingtip ia ka rukom trei rukom ktah ban kyrshan ia ki jingdonkam jong ki, bad kumta kane ka ktah jur ia ka jingai jingshakri sha ki paidbah ha ka liang ka koit ka khiah.

Nalor kata u Bah Marngar ula ong ba ka jingpynrung kam kaba la iaid shakhmat ia ki Group B bad C ka dei kaba pynlong ia ki eksam da ka HLL lyngba ka CBT mode.

“La sakhi ba bun na ki samla trai shnong ka jylla kim shym la ioh lad ban thoh ia ki eksam namar ka jinghap ban leit shaduh sha Guwahati, Jorhat, Dibrugarh bad Delhi. Kane ruh ka la khanglad bad pynduh kabu ia ki nong aplai kiba dei ki trai shnong ka jylla.Nalor kata ia ki jingkylla kaba iadei bad ka kam Record Clerk ruh la pynkhreh jingkylli da ka Hindi kaba la iaid lait ia ki kyndon ba la kdew bad ia ka syllabus,” ula ong shuh shuh.

Nalor kata u la ong ruh ba ka KSU kam sngew iahap satia ba ki samla ka jylla kin hap ban leit sha kiwei pat ki jylla jong ka ri ban thoh ia ki eksam bad ruh ba kane kam dei satia ka sien ba nyngkong ba kan wan jia kumne ia kaba ka Seng ka pyrshah jur ia kane.

“Baroh kine ki jingleh jong ka Agency ka la pynduh mynsiem shibun ia ki samla trai jylla bad ia kane hi la leh lyngba ka jingbthah da kino kino kiba don ha ka bor khnang ba kiwei pat ki briew na kiwei ki Jylla kin ioh ia kine ki kam bad ruh ban khanglad ia ki hok jong ki samla trai jylla,” ong u nongialam ka KSU.

Shuh shuh u la ong ba ka Seng ka la ioh jingtip ruh ba ka selection/screening committee ki la shah pynbor ban pynmih bad ban phah kyrkieh ia ki shithi pynrung kam sha kito ki nong aplai kiba la pass ia ki eksam khlem da bishar bniah ia ki kot ki sla badonkam bad ban iaid da ka lynti kaba dei.Kane ka lam sha ka jingjied ia kito ki nong aplai ki bym dei ban ioh.

Khnang ban khanglad ia kiba kum kine ki jingleh kiba ktah jur ia ki trai shnong riewlum ka jylla bad khnang ba kin ioh ia kajuh ka lad ka kabu, u Bah Marngar u la ong ba ka Seng ka kyntu ba ha ki sngi ki snem ki ban wan kino kino ki jingpynrung kam ka dei ban pyniaid hi da ka NEIGRIHMS.