Kyntu ka KSU iaki nongialam shnong ban khang pynrung kyrteng bar jylla haka electoral roll ha Amlarem

Syllad | The Rising MeghalayaOctober 31, 2021

Ka khasi Students’ Union (KSU) War Jaiñtia Circle kala kyntu ia baroh ki nongialam shnong hapoh Amlarem Sub Division ban khanglad iaki bar jylla kiba thmu ban pynrung kyrteng haka electoral roll thymmai ban tem iaka jingbuhai shnong beaiñ.

Ka KSU kala kyntu ia ki nongialam shnong ba kim bit ban ai kino kino ki syrnot sha ki briew ki bym dei trai shnong hapoh u Amlarem Constituency ban khang lad iaka jingthmu pynrung kyrteng ha ka electoral roll, kaba la jia ha kine ki khyndiat snem bala dep.

U president jong ka KSU War Jaiñtia Circle u Laitphar Syngkrem u la khot iaka jingiatreilang jong ki paidbah ban pyntip wut wut sha ka KSU lada lap ia kino kino ki suba bym dei trai shnong kiba pyrshang ban pynrung kyrteng haka electoral roll.

Une u nongialam ka KSU ula maham ruh ia ki briew kiba mlien ban wanrah bar jylla ba kim bit satia ban wanrah ia ki briew kiba trei beaiñ bad ki bym dei satia ki trai ri namar ba katba nangmih ki sngi ki bar jylla kila nang jyllei sha kane ka thain bad shnong beaiñ.