Kyntu ka KYKWM ban thaw iaka WJH Environment & Restoration Fund hadien ba ai sngewbha u kontrak T.5 lak

Syllad | The Rising MeghalayaAugust 1, 2023

Ban wad iaki lad ki lynti ban iada iaka wah Myntdu, ka ophis jong u Deputy Commissioner West Jaintia Hills District kala pynlong jingialang bad ka Jowai Municipal Board, Divisional Forest officer (Social Forestry), District Urban Planner, ka tnad PHE, Meghalaya State Pollution Control Board, ka seng Khooid Ya Ka Wah Myndtu (KYKWM), ka Synjuk ki Waheh Shnong Jowai kiba na sor bad khapsor bad ki katto kattne ki sengbhalang.

Iaka jingialang kaba long ha Conference Hall ka ophis u DC haka sngi Nyngkong kaba la pyniaid da u Ma M. Challam (ADM).

U president ka seng Khooid Ya Ka Wah Myntdu u KL Pariat haba kren sha ki lad pathai khubor hadien ka jingialang, ula pyntip ba haka jingshong jingialang la iakren halor ka pisa kaba la ai sngewbha da u uwei na ki kontraktor u ma Friday Hinge T. San lak na bynta ban pynbha ïa ka Myntdu.

Ula iathuh ba na ka liang ka seng ka la kyrpad ia u DC ban thaw da ka WJH Environment & Restoration Fund ne ka Govt Account na ka bynta ka Myntdu, bad ban thep ïa ka pisa bala synniang u Friday Hinge ha katei ka account khnang ban pynbha ïa ka Myntdu.

Nalorkata ula iathuh ba haka jingialang la ai jingmut ban khlong ïa u shyiap haka jaka pyllang um ba sam ka PHE na Myntdu Mupiah.

Ula iathuh ruh ba ka committee ka la rai ban pdiang bad ban pyntreikam ïa katei ka jingai jingmut bad yn sa thaw ïa ki kyndon katei ka fund katkum ka Meghalaya Environment & Restoration Fund bad ka committee ka la rai ruh ban pyntreikam tyngeh ïa ki kyndon ka aiñ Solid waste management ka ba aibor ban dain kuna T. 25,000/- ïa kiba bret khyndew sha ka Myntdu.