Kyntu ka kynhun iaka sorkar ban kyntiew bad pynneh pynsah ia tem ka put tynrai

Syllad | The Rising MeghalayaAugust 30, 2023

Ka kynhun ki nongthoh jingrwai, nongrwai, ki nongput nongtem tynrai bad kiwei pat na kane ka Nongbah Shillong ha ka 29 tarik mynta u bnai ki la iakynduh ia u Myntri ka Tnat Arts and Culture ka sorkar jylla u Bah Paul Lyngdoh bad aiti ia ka Memorandum kaba kyntu jur na ka bynta ban wanrah ia ka “Indigenous Center for Arts, Music”  khnang ban lum jingtip bad ban pynneh pynsah ia ki jingtem jingput bad ki jingrwai tynrai ha ka jylla.

Ha kane ka jingiakynduh ba la ia don lang ruh u Bah FR Kharkongnor, Commissioner & Secretary Arts and Culture, ka sorkar Meghalaya, kane ka kynhun ka la kyntu jur ia une u Myntri bad ia ka tnat ba dei khmih ban shimkhia halor kane ka bynta namar haduh mynta naduh ba la wanrah ia ka thoh ka tar bad ia ki kor jingthoh ne letter press kiba bun na ki jingthoh kiba pynpaw ia ka jinghiar pateng ki dang iai don bad pynneh da ki kynhun bapher bapher, kata kynthup ia ki riew paidbah bad ki library ba shimet.

Watla katta na ka liang ka kynhun ka pynpaw ka jingbynniaw ha kaba iadei bad kane ka jingpynneh pynsah ia ki jingrwai bad ki jingtem jingput tynrai ia kiba la rekod ha ki radio station ha ka jylla bad shabar, kata kum sha Kolkata bad Guwahati naduh shwa jong ka jingioh laitluid jong ka ri.

Na ka liang kane ka kynhun ka la kyntu ruh ia ka sorkar ba kan thaw ia ka commission ka ban kynthup ia ki nongthaw jingrwai, ki nongthoh bad kiwei pat kum ki dkhot, bad kane ka commssion kan long ka kynhun kaba laitluid.

Shuh shuh ka kynhun ka la aijingmut ruh ba ia baroh ki jingrwai tynrai ba la thoh bad rwai ha ka ktien Khasi, Jaintia, Garo, Hindi, English bad kiwei pat da ki nongrwai kiba dei ki trai shnong dei ban lum thup bad pynneh pynsah ia ki.