Kyntu ka liang pyrshah Congress ia ka Sorkar ban buh da ka ‘contingency fund’ ban pynkloi iarap lanot mariang

Syllad | The Rising MeghalayaSeptember 22, 2023

U MLA ka liang pyrshah Congress na Umsning u Bah Celestine Lyngdoh haka sngi Thohdieng u la kyntu ia ka sorkar jylla ba kan buh da ka ‘contingency fund’ na ka bynta ki lad aijingiarap kiba kyrkieh sha kito ki longiing kiba shah ktah ha ki jingjia shah pynjulor ha ki bor ka mariang.

Haba iashim bynta ha ka jingiamir jingmut ha ka kynta buh jingkylli hapoh ka iingdorbar thawain, u Bah Lyngdoh u la aijingmut ba ia kane ka contingency dei ban buh ha ki MLA khnang ba kan iarap ban pynkloi ha kaba iadei bad ki lad aijingiarap.

“Lada na ka liang ka sorkar kam shaniah ia ki MLA, ka lah ruh ban buh ia kane ka mang pisa ha ki ophis jong ki Deputy Commissioner bad ban pyllait ia kane ka jingiarap lyngba ka jingmynjur da ki MLA,” ong une u MLA da kaba bynrap ruh ba kine ki lad jingiarap ki hap ban iaid ia ka lynti kaba jngai na ka bynta ban aijingiarap ia ki lanot kiba shah ktah ha ki bor mariang.

Haba jubab ia kane, u Myntri Rangbah ka jylla u Conrad K Sangma u la ong ba u sngewkmen shibun ban pyntip hapoh ka iingdorbar ba ha ka jingialang ba dang shen jong ka sorkar MDA, ki la don katto katne ngut ki MLA kiba la ai ia kane ka juh ka jingtyrwa.

Watla katta u la ong ba watla ka sorkar kam lah ban pynkhreh ia kane ka mang pisa namar ka lah ban ktah ha kaba iadei bad ka pla tyngka, hynrei lah pat ban iarap halor kane ka bynta lyngba ka Special Rural Works Program (SRWP) bad ka  Special Urban Works Program (SUWP) khnang ban weng ia kane ka jingeh.

U la ong ba lah ruh ban pynkylla ia ki kyndon jong ka SRDF khnang ban plielad ban pynkhreh ia kane ka mang pisa bad SRWP bad SUWP kumba la leh ha ka por jong ka khlam Covid.” “Ngi dang bishar bniah bad pynkhreh ha kaba iadei bad kane ka bynta.” u la ong shuh shuh.

Ha kaba iadei bad ka jingkylli jong u chief whip ka liang pyrshah u Saleng A Sangma ba sorkar ka don ne em ia kano kano ka jingtyrwa na ka bynta ban kyntiew ia ka skhim SRWP.

Halor kane u CM ka jylla u la ong ba watla kane ka jingdawa ka dei kaba shongnia, hynrei u la ong ba na ka liang ka sorkar kan hap ban khmih ia ka mang tyngka namar ha kine ki san snem ba la dep ka la dep lypa ban kyntiew ia ka skhim SRWP sha ka T. 50 lak. Nalor kata u la ong ruh ba kane ka skhim SRWP ha Meghalaya ka kham heh shibun haba ia nujor bad kiwei pat ki jylla jong ka ri.