Kyntu ka Maitshaphrang ban pynbna ia ka 6 tarik Nohprah kum ka “Phan Nonglait Day”

Syllad | The Rising MeghalayaDecember 7, 2023

Ka Maitshaphrang ka la rakhe ia ka lyngkhuh sngi iap ba 173 snem jong ka riewshlur ka jaidbynriew, ka Phan Nonglait da kaba kyntu ia ka sorkar jylla ban pynbna noh ia ka 6 tarik Nohprah kum ka “Phan Nonglait Day,” kata kum ka dak ka jingai burom ia ka jingnoh synniang bad ka jinglen lade bad ruh ban ai da ka khusnam kum ka dak ka jingleh burom na ka bynta jong ka.

Ka Maitshaphrang ka pynkynmaw ruh ba ka la pynlong ia ki jingialehkai drama ba la ai kyrteng, “Ka Drama jong ka Phan Nonglait” ha kiba bun tylli ki shnong ha ka nongbah Shillong bad ha ka shnong Nongkhlaw ha ki snem 1994-95, da kaba pynpaw halor ki jingnoh synniang ki jong ka halor ka jingialeh laitluid.

Ia ka kot kaba iadei bad kane ka drama ruh la pynmih ha kaba ia ka kyntien maitphang la thoh da u (L) Dr. Barrister Pakem uba dei u Vice Chancellor barim jong ka skulbah North Eastern Hill University.

Ka kot ba la ai kyrteng “Ka Phan Nonglait – A Lady Freedom Fighter of India” ba la thoh da u muktiar ka Supreme Court u Bah Daniel Stone Lyngdoh hadien ka jingwad bniah ia kaba la don bynta ruh da u Salman Khurshid bad ia kaba la pyllait paidbah ha ka 29 tarik u Iaiong 2022 ka la nang pynskhem halor ka jingdonkam kyrkieh ban ai ia katei ka jingithuh.

Nalor kata ka Maitshaphrang ha u kyrwoh lyngba u Bah Michael N Syiem Convenor ka pynpaw ruh ba kine ki kam shlur jong ka Phan Nonglait ki ain mynsiem ia ka jaidbynriew jong ngi mynta namar ka dei ka jaidbynriew rit paid kaba la shah kerkut da ki jaidbynriew kiba heh paid suda.

Kumta ka donkam palat ia ka jingiatreilang kaba jan bha hapdeng ki kynthei bad ki shynrang khamtam ha ka bynta ban pyntreikam ia ka Meghalaya Compulsory Registration of Marriage Act bad ban kyrshan ban pynlong ain noh ia ka Equitable Distribution of Self Acquired and Ancestral Property.

Shuh shuh ka pynpaw ruh ba ki kam shlur jong ka Phan Nonglait ki pyni lynti ruh ba ha ka khim ha ka banse, sha ki jaka ba ki shynrang kim long shuh ban tur dei ki kynthei kiba lah ban rung haduh ki kamra ba thiah ki nongshun.