Kyntu ka MITCRM ia ka jingtuklar ka President ka Ri ban weng mardor ia u VC ka NEHU

Syllad | The Rising MeghalayaDecember 2, 2024

Ka Synjuk ki Rangbah Shnong, Seng Kynthei bad ki Sengbhalang bapher bapher ka Rilum Khasi Jaintia bad Garo hapoh ka lama jong ka Meghalaya Indigenous Tribes Constitutional Rights Movement (MITCRM) ka la kyrpad ia ka jingtuklar lem jong ka President ka Ri India ka Droupadi Murmu na ka bynta ban weng noh mardor ia u Prof PS Shukla kum u Vice Chancellor ka Skulbah North Eastern Hill University (NEHU).

Ha ka shithi sha ka President ka Ri kaba dei ruh ka Visitor jong ka NEHU, ka MITCRM ka pyntip ba ha ka jingialang kaba la long ha ka 14 tarik Naiwieng ka la shim ia ka rai ban ieng ryngkat bad ki samla pule ka NEHU kiba pynlong jingiakhih kumjuh ki nongtrei jong ka bad kyrshan pura halor baroh ki mat jingiakhih na ka bynta ka bha ka miat jong kane ka Skulbah, ka Jylla bad ka thain Shatei Lammihngi hi baroh kawei.

“Haba khmih bniah ia ka jinglong mynthi bad ki sienjam ba la shim da u Vice Chancellor pyrshah ia ki samla ba pynlong jingiakhih ia kaba dei ban leh da kaba husiar bha, ka MITCRM ka la pynbna ia u Prof PS Shukla Vice Chancellor ka NEHU kum u briew u bym lah satia ban pdiang bad ka Synjuk ka la rai ban khang syndon ia ka jingwan ka jong u hapoh ka jylla Meghalaya,” ka la ong.

Ka la bynrap ruh da kaba ong, “U Prof Shukla um sngewthuh ne pyrshang ban sngewthuh ia ka burom ka akor jong ki riewlum, ia ka rukom im, ki riti dustur jong ka Meghalaya bad ka thain Shatei Lammihngi. Pynban u la pyrshang ban banbor ia ki baroh. Ki jingleh ki jong u ki la iaid pyrshah na ka bynta ka bha ka miat bad ki jingmyntoi jong ki trai muluk, bad kaba pynpaw ruh ia ka jingthmu bym sngewtynnad kaba don ha ki jingmut jingpyrkhat jong u bad kaba pynsniewdur bad pynjah burom ia ka jaka tnad pule bad ia ka imlang sahlang jong ngi lada ym lah ban tehlakam.”

“Ka MITCRM hadien ka jingiatai sani bha ha baroh ki liang ia ki jingleh jong u Vice Chancellor ka la dawa ba dei ban weng noh ia u mardor. Ngi kyntu jur ia ka jingtuklar lem ka jong u halor kane ka phang shwa ba kiei kiei kin nang kham sniew shuhshuh,” ong ka MITCRM ha ka shithi.