Kyntu ka MLA Sutnga Saipung ia ka sorkar ban kyntiew kyrdan ia ka Umkiang PHC

Syllad | The Rising MeghalayaJuly 31, 2023

Ka MLA ka  Sutnga Saipung, ka Kong Santa M Shylla, mynta ka sngi ka la phah da ka jingthoh sha u Myntri Rangbah ka jylla u Conrad K Sangma kumjuh sha ka Myntri ka tnat ka koit ka khiah ka Kong Ampareen Lyngdoh ha kaba ka la kyntu na ka bynta ban kyntiew kyrdan noh ia ka Umkiang PHC sha ka CHC, kumjuh ban tei ia ka PHC kaba thymmai hapoh ka constituency jong ka.

Kane ka nongmihkhmat ka la ong ba kane ka jingtyrwa ban kyntiew kyrdan ia ka Umkiang PHC sha ka CHC bad ruh ban wanrah ia ka PHC kaba thymmai hapoh Sumer Sirdarship bad hapoh ka shnong Hingaria village ka long na ka bynta ka jingmyntoi jong ki paidbah nongshong shnong jong ka thain hi baroh kawei

Nalor kata ka MLA ka thain ka la pynpaw ruh halor ka jingdonkam ia kine ki jaka sumar namar kine ki don ha ki thain kiba kham kyndong bad sahdien ha ki bynta khappud  ka India bad ka Banglesh. Kumta ruh ka la ong ba ka jingkyntiew kyrdan kan iarap shibun ia ki paidbah ka thain bad pynduna ia ka jingdonkam ba kin leit wad jingsumar sha ki jaka sor kiba jngai.

Shuh shuh ka la kyntu ia ka sorkar jylla ba kan bishar bniah ia kine ki jingtyrwa na ka bynta ka jingbit jingbiang bad ka bha ka miat jong ki paidbah jong ki nongshong shnong ha kine ki thain.