Kyntu ka MPUF ïaki VDP Saitpathi bad Lumsniehriang ban ïatreilang bad ki bor pulit ban tem ïaki kam sniew

Syllad | The Rising MeghalayaOctober 9, 2019

KHLIEHRIAT: U President MPUF, Khliehriat Circle u Kyrshan Blah, ula ong “ki dkhot VDP longkmie, ba ki dei ban don ka  jingiajan ne iatreilang bad ki bor Pulit khnang ba kin lah ban tem ïaki kam sniew bad ba kin suk ha kano kano ka kam jong ki.”

“Ki VDP lada don kino kino ki jingeh ba ki iakynduh kila lah ban pyntip sha ka seng ban iatreilang na ka bynta ka miat ka bha jong ka imlang sahlang,” la ong Kyrshan Blah haka jingai sngewbha ka MPUF da ki Torch Light sha ki VDP jong ka Saitpathi bad Lumsniehriang, Khliehriat East.

U Kyrshan Blah u la ong ba kane ka jingai jong ki da ki Torch Light sha ki dkhot VDP longkmie jong ki ar tylli ki dong ka Khliehriat, ka long kawei na ki kam iarap mon sngewbha kiba ka seng ka juh leh bad ka jingai da ki Torch Light khnang ba ki VDP kynthei kin pyndonkam ha ka por pahara shnonghaka por miet. Ula ong ba kum ki VDP ki donkam ia ka torch light ban ioh ia ka jingshai. U la ong ba kane ka jingaisngewbha jong ki kalong da ka jingia synniang ki para dkhot katba ioh bad la ioh ban thied ia kine ki Torch Light.

Na ka liang ka kong Sara ka la ong ba na ka liang ki VDP jong ki ar dong ki dap da ka jingsngewkmen ba don ba ai jingiarap ia ki na ka bynta ka kam ba ki trei bad ki pdiang sngewbha ruh ia kine ki jingai sngewbha kiba donkam na ka bynta jong ki kum  ki dkhot VDP.

Ia ka jingialang la pyniaid da ka President VDP seng Kynthei kong Sara Rymbai, ha ka jingiadonlang ka Secretary VDP kong Pdiangmon Rymbai, Kyrshan Blah President MPUF, Khliehriat Circle, Rangbah Dong Saitpathi ma Wilson Dkhar, samla Johnny Phawa President MPUF Mukhaialong, ma Thynnda Sana, ki dkhot ka MPUF bad ki VDP longkmie jong ka Saitpathi bad Lumsniehriang.