Kyntu ka MSSASA ban ai por 3 taiew ia ki skul SSA ban rai halor ka jingshimti da ka Sorkar

Syllad | The Rising MeghalayaApril 15, 2025

Ka Meghalaya SSA Schools Association (MSSASA) ha ka 15 tarik Iaiong ka la kyntu ia ka Sorkar Jylla ba kan ai por lai taiew ia ki skul SSA ki bym shym la mynjur ban aiti ia ki NoC na ka bynta ka jingshimti da ka tnad Education ba kin shim ia ka rai halor kane ka phang.

Halor kane ka kynhun ka la aiti ruh da ka dorkhas sha u Commissioner & Secretary ka Tnad Education u Vijay Kumar Mantri hadien ka jingbthah ba dang shen jong ka tnad ban aiti lane ban pyniasoh halor ka jingpyniaid ia ki skul SSA ba pyniaid da ki shnong, ki riew shimet, ki mission ne society sha ka tnad.

U president ka MSSASA u Bah Aristotle C Rymbai u pyntip ba ki don katto katne ki skul SSA ki ban dang aiti ia ki jingmynjur lane ki bym pat kwah namar ki jingeh ban pynkohnguh ia ki Managing Committee jong ki skul (SMC).

“Ngi sngewthuh ba kane ka kam ka dei kaba kham kyllain, bad kine ki skul ki lah ban dang donkam shuh shuh ka por khnang ba kin lah ban shim ia ka rai. Namar kata ngi kyrpad ia phi ba phin ai por lai taiew na ka bynta kiba kum kine ki skul tad haduh ka 5 tarik u Jymmang 2025, ba kin shim ia ka rai halor ka jingmynjur ban aiti ia ki NoC ban aiti sha ka Sorkar  bad ban pynmih ia ki kyndon jingbthah kiba shai na ka tnad Education khnang ban pynthikna ba ki sienjam kiba iadei bad kane ka jingthmu kin long kaba iaid beit iaid ryntih,” u la ong ha ka dorkhas.

Nalor kata ka Assocation ka la aiti ruh ia ka jingai jingmut ha kaba iadei bad ki kyndon jong ka Sorkar India ia kaba kam shym la pyniapher ia ki skul SSA na ki skul Sorkar bad ba kin ym don ka jingbuh kyrpang ia ki nonghikai kumba la mang da ka Sorkar Pdeng, hynrei ia kaba baroh ki nonghikai kin hap hapoh ka jingkitkhlieh jong ka Sorkar Jylla bad thew sha ka Meghalaya Right to Children to Free and Compulsory Education Rules 2011 sub-rule (1) of rule 18 kaba ong, “Ka Sorkar Jylla ne ki bor ba dei khmih kin pyntip ia ki kyndon jong ka jingshakri bad ka jingsiew tulop bad ki allowance jong ki nonghikai khnang ban thaw ia ka kynhun jong ki nonghikai kiba tbit bad kiba pura, bad ki kyndon treikam bathymmai ka SSA kaba ong, “Ki Jylla ki dei ban pynneh ia kijuh ki nonghikai bad yn ym shah ban pyniapher ia ki nonghikai SSA namar ia baroh ki nonghikai yn hap ban pynlut da ka Sorakr Jylla.

Ha kajuh ka por ka Association ka aijingmut ruh halor ka jingdonkam jong ka tnad Education ban pyniaid shakhmat na ka bynta kito ki skul SSA kiba la mynjur da ka mon sngewbha ban aiti ia ki NoC na ka bynta ban aiti ia ka jingpyniaid jong ki sha ka sorkar.