Kyntu ka MSSASA ban pynkha post bad pynskhem pura ia ki 12541 ngut ki nonghikai SSA ha ka Jylla

Syllad | The Rising MeghalayaMarch 4, 2024

Ka Meghalaya SSA Schools’ Association (MSSASA) ha ka 4 tarik Lber ka la dawa na ka sorkar ba kan pynkha biang ia ki post thymmai bad ban pynkynriah ia ki 12541 ngut ki nonghikai SSA na ka State Implementing Society sha ka Tnat Education ka Jylla katkum ki kyndon jong ka RTE/SSA kumjuh ban pyndap noh ia ki post kiba thylli ha ki lower bad upper primary school.

Haba kren sha ki lad pathai khubor, u president ka MSSASA u Bah Aristotle C Rymbai u la ong ba ka Seng ka la dep phah ruh da ka dorkhas sha u Chairperson ka State Education Commission ha ka 1 tarik u Risaw 2023 ban dawa ban thaw ia ki post kiba thymmai bad ban pynkynriah ia ki 12541 ngut ki nonghikai SSA kiba la don lypa na ka State Implementing Society sha ka Tnat Education ka Jylla katkum ki kyndon RTE/SSA norms.

U la ong ruh ba ka Seng ka la ioh pdiang ia ka jubab na u Member Secretary ka State Education Commission u Ambrose Ch Marak uba la pyntip ba ka Commission ka la ioh pdiang ia ka jingthoh bad ba ka dang bishar bniah ia ki sienjam da kaba phah ia kane sha ka sub committee ba kan bishar bniah shuh shuh.

U Bah Rymbai u pyntip ruh ba ki don kumba 22 tylli ki post kiba thylli ha ki skul lower primary bad 89 tylli ha ki skul upper primary.

“Ngi la phah la bun tylli ki memorandum sha ka sorkar hynrei haduh mynta kam pat shym la don kano kano ka jubab.

“Na kane, mynta ka sngi ngi la leit ban iakynduh ia u state project director bad aiti ia ka shithi pynkynmaw ia kaba u la pynthikna ba un rah ia kane ka kam sha ka jingiakren bad ki bor sorkar,” ong u president uba la bynrap ruh ba shen kin sa leit ban iakynduh ruh ia u Myntri ka Tnat pule puthi ka jylla u Rakkam A Sangma ban iakren halor kane ka mat.

 “Naduh kine ki lai snem kiba la leit noh ki sanction post na ka bynta ki head teacher bad assistant teacher hapoh ki skul SSA lower primary bad upper primary ha ka jylla ki la sah thylli namar ki jingiehnoh kam, ki jingkhlad bad kiwei pat, bad kane ka ka ktah ia ka pule puthi jong ki khynnah hapoh kito ki skul namar ka jingbym don nonghikai,” ong u Bah Rymbai.

Ha kawei pat ka bynta na ka liang u president ka MSSASA u la kyntu ruh ia baroh ki nonghikai skul SSA ba kin pyrshang ia kaba bha tam na ka bynta ban kyntiew ia ka jingdon jong ki khynnah skul khnang ba kan ym don jingktah ia ki skul hadien habud.