Kyntu ka NESO ia ka jingtuklar u Myntri ka Sorkar Pdeng halor ka jinglong jingman ha ka skulbah NEHU
Ka North East Students’ Organization (NESO) ha ka 12 tarik u Naiwieng ka la phah da ka shithi sha u Myntri ka Sorkar Pdeng uba khmih ia ka Tnad pule puthi u Dharmendra Pradhan ha kaba ka la kyntu ba un tuklar bad pynbeit lem mardor ia ki jingeh kiba mih hapoh ka skulbah North Eastern Hill University (NEHU).
Kane ka la wan longruh hapdeng ka jingiakhih shah thngan kaba dang iai bteng da ki samla pule ka NEHU ba la ialam da ka North Eastern Hill University Students’ Union (NEHUSU) bad ba la kyrshan da ka KSU-NEHU Unit, kiba la dawa ban weng noh mardor ia u Vice Chancellor u Prof PS Shukla, Registrar, Deputy Registrar bad kiwei ki Ophisar. Kane ka skulbah kala don hapdeng ka jingkhang dam na kane ka jingiakhih kaba la jam sha ka sngi kaba phra.
“Ka NESO ka kyrshan jur ia ki jingdawa jong ka NEHUSU bad ka KSU-NEHU Unit na ka bynta ki samla pule namar baroh ki jingdawa ki dei kiba shong hok bad kiba donkam kyrkieh ban pynbeit noh mardor khnang ban lah ban kyntiew ia ka burom jong ka NEHU kumba kalong ha ki snem kiba la leit noh.Ka NESO ka kyrpad ia ka ophis jong phi ba kan sngewbha ban tuklar lem noh mardor khnang ban pynthikna ba ka pule puthi kaba janai ha ka thain bad ka ri kan ym shah iapein,” ong u Chairman ka NESO u Bah Samuel B Jyrwa ha ka shithi sha u Pradhan.
“Ka jingpyniaid ia ka University hapoh ka jingialam jong une u VC ba mynta u Prof Prabhakar Shankar Shukla bad u Registrar, Col. Omkar Singh (Retd.), ka la poi ha u pud bym lah leh ei ei shuh, bad kaba la pynhiar kyrdan ia ka pule puthi, ki jingtei bad ia ka nam ka burom jong ka skulbah. Ka jinghiar kyrdan jong ka skulbah ka la pyni shai kdar ia ka jingbym lah jong ki bor pyniaid ban pyndep ia ki kamram kiba kongsan,” u la ong da kaba bynrap, “Shwa ka jingwan shimti jong u Prof Shukla kum u VC, ka NEHU ka ju don ha ka kyrdan top 60 na ki University hapoh ka Ri. Hynrei, hapoh ka jingialam jong une u VC ba mynta, ka University ka la hiar arsut sha ka kyrdan hapdeng ka 100-150 tang ha kine ki lai snem ba la dep. Kane ka jinghiar kynsan ka dei kaba sngewkhia shibun bad kaba donkam ia ka ban pynbeit noh mardor.”
Nalor kata u Bah Samuel Jyrwa u la ong ba wat hapdeng ka jingpyrshang da kine ki artylli ki seng samla pule ban wanrah ia ka jingsngewkhia jong ki samla pule lyngba ki dorkhas bad ki jingdawa, hynrei na ka liang u Vice Chancellor um shym la lah ban leh ei ei halor kine ki kam kiba kongsan kiba ktah ia ka University.Ka jinglong mynthi ka jong u bad ka jingpulim ban shim ia ki sienjam kiba kongsan ban pynbeit ia kine ki jingeh ka la wanrah ia ka jingbym hun bad ka jingbym shaniah hapdeng ki samla pule.
Haba kdew halor ki kam kiba paw hapoh ka jingialam jong une u VC ka NEHU, ka NESO ka la ong ba ka University ka la iai bteng ban mad ia ki jingeh halor kiba bun ki jingduna, kata kynthup ia ka jingbym biang ki jingdonkam ha ki Hostel, ka jingbym biang ha ki laboratory, ka jngduna ki nongtrei ban pyniaid beit ia ki kam ki jam jong ki Tnad bapher bapher. Wat haba la mang ia ki kam kiba sah thylli hynrei na ka liang u Vice Chancellor um shym la lah ban shim ia ki sienjam kiba donkam ban pyndep ia kine ki kam ha ka por.
Facebook
Instagram
Youtube
Twitter
Leave a Reply